24-27 июль кунлари Буюк Британиянинг Ўзбекистондаги элчихонаси томонидан Коррупцияга қарши курашиш агентлиги кўмагида "Юқори даражадаги мансабдор шахсларда ҳалоллик стандартларини шакллантириш" мавзусида ўқув курслари ташкил этилди.

Мазкур ўқув курсларига Буюк Британиянинг турли соҳалардаги экспертлари жалб этилган бўлиб, унда Коррупцияга қарши курашиш агентлиги, Ички ишлар, Мудофаа, Иқтисодиёт ва молия, Қурилиш ва уй-жой коммунал хўжалиги вазирликлари ҳамда Миллий гвардия, Давлат хизматини ривожлантириш, Ахборот ва оммавий коммуникациялар агентликларининг вакиллари иштирок этмоқда.

Иштирокчилар сафида қўшни мамлакатлар — Қозоғистон, Қирғизистон ва Туркманистон Республикалари вакиллари ҳам бор.

Маълумот учун: Ушбу курсларнинг дастлабкиси 2022 йил 6-9 июнь кунлари ташкил этилган ва унда турли вазирлик-идораларнинг 30 нафарга яқин вакиллари қамраб олинган эди.

Ўқув курсларида давлат хизматига коррупциянинг таъсири, ҳалолликни шакллантириш долзарблиги, мансабдор шахсларнинг хулқ-атвори ва ахлоқ қоидалари, давлат молиясини бошқариш (фирибгарлик, хатар ва аудит), шунингдек, харид қилиш, инсон ресурсларини бошқариш ва гендерга оид коррупция хавфлари, коррупцияга қарши кураш бўйича стратегия ва режалар, мазкур жараёнларда ОАВ ва фуқаролик жамиятининг роли каби муҳим мавзуларда маълумотлар берилмоқда.

Курслар давомида Агентлик вакиллари томонидан коррупцияга қарши курашиш соҳасидаги ислоҳотлар, олиб борилаётган чора-тадбирлар юзасидан тақдимот ўтказилди.

Коррупцияга қарши курашиш агентлиги

Ахборот хизмати