24-27-iyul kunlari Buyuk Britaniyaning O‘zbekistondagi elchixonasi tomonidan Korrupsiyaga qarshi kurashish agentligi ko‘magida "Yuqori darajadagi mansabdor shaxslarda halollik standartlarini shakllantirish" mavzusida o‘quv kurslari tashkil etildi.

Mazkur o‘quv kurslariga Buyuk Britaniyaning turli sohalardagi ekspertlari jalb etilgan bo‘lib, unda Korrupsiyaga qarshi kurashish agentligi, Ichki ishlar, Mudofaa, Iqtisodiyot va moliya, Qurilish va uy-joy kommunal xo‘jaligi vazirliklari hamda Milliy gvardiya, Davlat xizmatini rivojlantirish, Axborot va ommaviy kommunikatsiyalar agentliklarining vakillari ishtirok etmoqda.

Ishtirokchilar safida qo‘shni mamlakatlar — Qozog‘iston, Qirg‘iziston va Turkmaniston Respublikalari vakillari ham bor.

Maʼlumot uchun: Ushbu kurslarning dastlabkisi 2022-yil 6-9-iyun kunlari tashkil etilgan va unda turli vazirlik-idoralarning 30 nafarga yaqin vakillari qamrab olingan edi.

O‘quv kurslarida davlat xizmatiga korrupsiyaning taʼsiri, halollikni shakllantirish dolzarbligi, mansabdor shaxslarning xulq-atvori va axloq qoidalari, davlat moliyasini boshqarish (firibgarlik, xatar va audit), shuningdek, xarid qilish, inson resurslarini boshqarish va genderga oid korrupsiya xavflari, korrupsiyaga qarshi kurash bo‘yicha strategiya va rejalar, mazkur jarayonlarda OAV va fuqarolik jamiyatining roli kabi muhim mavzularda maʼlumotlar berilmoqda.

Kurslar davomida Agentlik vakillari tomonidan korrupsiyaga qarshi kurashish sohasidagi islohotlar, olib borilayotgan chora-tadbirlar yuzasidan taqdimot o‘tkazildi.

Korrupsiyaga qarshi kurashish agentligi

Axborot xizmati