Жорий йилнинг 1-ярим йиллигида  Коррупцияга қарши курашиш агентлигига жами 1 562 та  мурожаат келиб тушди ва уларнинг  ўрганиш натижасига кўра, 4 та ҳолат бўйича жиноят иши қўзғатилди.  

Жумладан, фуқаро.М.Д.нинг мурожаати асосида собиқ Халқ таълими вазирлигига қарашли Ўзбекистон “Ёшлик” жисмоний тарбия ва спорт жамияти томонидан амалга оширилган харидга оид ҳужжатлар ўрганилди. 

Аниқланишича, Жамият мансабдор шахслари томонидан 2022 йил  6 январда тасдиқланган спорт тадбирлари тақвим режасига “Умид ниҳоллари-2022” спорт мусобақаларининг финал босқичи киритилган ва мусобақа ҳаражатлари 28 млрд 909 млн сўм этиб белгиланган. 

Ўзбекистон Республикаси Вазирлар Маҳкамасининг 30.10.2019 йилдаги 898-сонли қарорига асосан ушбу спорт мусобақаларининг якуний босқичи март-май ойларида ўтказилиши маълум бўлса-да, Жамият мансабдорлари ва бошқалар мусобақа  ғолиб ва совриндорларини тақдирлаш юзасидан зарур чораларни кўрмасдан, вақтни сунъий чўзиб келган.

Натижада қиймати 28 млрд 909 млн сўм деб белгиланган маҳсулотларни муддатнинг қисқалиги важи билан тўғридан-тўғри харид қилиш имконига эга бўлиш мақсадида Жамият мансабдор шахслари 1.07.2022 йилда Вазирлар Маҳкамасининг 156-сонли баёни имзоланишига эришган. 

Шунингдек, ўтказилган танловда ғолиб бўлган “UNITED TRADE SYSTEM” МЧЖ билан тузилган 27 млрд 691 сўмлик шартномага маҳсулотнинг нархига таъсир қилувчи техник кўрсаткичлари қасддан киритилмаган ва мазкур шартнома Ўзбекистон Республикаси  Иқтисодий тараққиёт ва камбағалликни қисқартириш вазирлиги ҳузуридаги “Лойиҳалар ва импорт контрактларини комплекс экспертиза қилиш маркази” ДУКнинг экспертизасидан  ўтказилмаган. 

Маълумот учун:  “UNITED TRADE SYSTEM” “Ёғоч қурилиш материаллари ва санитария-техник ускуналар улгуржи савдоси” фаолият тури бўйича давлат рўйхатидан ўтган. Жамиятга 7 турдаги “Спорт эпикировкаси” (спорт кийими, кепка, сумка, кроссовка) , велосипед, “Lenovo” ноутбуки, кубок, Samsung -32d русумли телевизор, спорт медали, диплом ва рамка масулотлари етказиб берган. 

Ушбу мурожаат асосида ўтказилган ўрганиш якунлари бўйича тўпланган ҳужжатлар Бош  прокуратурага юборилган. Ўтказилган терговга қадар текширув натижалари бўйича Бош прокуратура томонидан Жамият мансабдор шахсларига нисбатан Ўзбекистон Республикаси Жиноят Кодексининг 167-моддаси 3-қисми “а” банди билан жиноят иши қўзғатилган. 

Ҳозирда Уюшган жиноятчилик ва коррупцияга қарши курашиш бошқармаси томонидан тергов ҳаракатлари олиб борилмоқда.

Коррупцияга қарши курашиш агентлиги

Ахборот хизмати