Joriy yilning 1-yarim yilligida  Korrupsiyaga qarshi kurashish agentligiga jami 1 562 ta  murojaat kelib tushdi va ularning  o‘rganish natijasiga ko‘ra, 4 ta holat bo‘yicha jinoyat ishi qo‘zg‘atildi.  

Jumladan, fuqaro.M.D.ning murojaati asosida sobiq Xalq taʼlimi vazirligiga qarashli O‘zbekiston “Yoshlik” jismoniy tarbiya va sport jamiyati tomonidan amalga oshirilgan xaridga oid hujjatlar o‘rganildi. 

Aniqlanishicha, Jamiyat mansabdor shaxslari tomonidan 2022-yil 6-yanvarda tasdiqlangan sport tadbirlari taqvim rejasiga “Umid nihollari-2022” sport musobaqalarining final bosqichi kiritilgan va musobaqa harajatlari 28 mlrd 909 mln so‘m etib belgilangan. 

O‘zbekiston Respublikasi Vazirlar Mahkamasining 30.10.2019-yildagi 898-sonli qaroriga asosan ushbu sport musobaqalarining yakuniy bosqichi mart-may oylarida o‘tkazilishi maʼlum bo‘lsa-da, Jamiyat mansabdorlari va boshqalar musobaqa  g‘olib va sovrindorlarini taqdirlash yuzasidan zarur choralarni ko‘rmasdan, vaqtni sunʼiy cho‘zib kelgan.

Natijada qiymati 28 mlrd 909 mln so‘m deb belgilangan mahsulotlarni muddatning qisqaligi vaji bilan to‘g‘ridan-to‘g‘ri xarid qilish imkoniga ega bo‘lish maqsadida Jamiyat mansabdor shaxslari 1.07.2022-yilda Vazirlar Mahkamasining 156-sonli bayoni imzolanishiga erishgan. 

Shuningdek, o‘tkazilgan tanlovda g‘olib bo‘lgan “UNITED TRADE SYSTEM” MCHJ bilan tuzilgan 27 mlrd 691 so‘mlik shartnomaga mahsulotning narxiga taʼsir qiluvchi texnik ko‘rsatkichlari qasddan kiritilmagan va mazkur shartnoma O‘zbekiston Respublikasi  Iqtisodiy taraqqiyot va kambag‘allikni qisqartirish vazirligi huzuridagi “Loyihalar va import kontraktlarini kompleks ekspertiza qilish markazi” DUKning ekspertizasidan o‘tkazilmagan. 

Maʼlumot uchun:  “UNITED TRADE SYSTEM” “Yog‘och qurilish materiallari va sanitariya-texnik uskunalar ulgurji savdosi” faoliyat turi bo‘yicha davlat ro‘yxatidan o‘tgan. Jamiyatga 7 turdagi “Sport epikirovkasi” (sport kiyimi, kepka, sumka, krossovka) , velosiped, “Lenovo” noutbuki, kubok, Samsung -32d rusumli televizor, sport medali, diplom va ramka masulotlari yetkazib bergan. 

Ushbu murojaat asosida o‘tkazilgan o‘rganish yakunlari bo‘yicha to‘plangan hujjatlar Bosh  prokuraturaga yuborilgan. O‘tkazilgan tergovga qadar tekshiruv natijalari bo‘yicha Bosh prokuratura tomonidan Jamiyat mansabdor shaxslariga nisbatan O‘zbekiston Respublikasi Jinoyat Kodeksining 167-moddasi 3-qismi “a” bandi bilan jinoyat ishi qo‘zg‘atilgan. 

Hozirda Uyushgan jinoyatchilik va korrupsiyaga qarshi kurashish boshqarmasi tomonidan tergov harakatlari olib borilmoqda.

Korrupsiyaga qarshi kurashish agentligi

Axborot xizmati