Таҳлилларга кўра, 2022 йилда республика бўйича судлар томонидан жами 4607 та коррупцияга оид жиноятлар кўрилган бўлиб, 7 414 нафар шахслар жавобгарликка тортилган ва уларнинг 1 482 нафари ёки 20 фоизи озодликдан маҳрум этилган.

Ҳудудлар бўйича таҳлил қилинганда Қашқадарё вилояти (563 та), Андижон вилояти (553 та) Наманган вилояти (536 та), Тошкент вилояти (417 та) республикадаги кўп коррупциявий жиноятлар содир этилган ҳудудлар ҳисобланиши маълум бўлди.

Коррупциявий жиноятлар турлари бўйича 3 670 нафар шахс ўзлаштириш ёки растрата йўли билан талон-торож қилиш, 1 289 нафар шахс пора бериш, 1 162 нафар шахс фирибгарлик, 199 нафар шахс пора олиш, 254 нафар шахс ҳокимият ёки мансаб ваколатини суиистеъмол қилиш, 160 нафар шахс мансаб сохтакорлиги, 680 нафар шахс бошқа жиноятлар учун жавобгарликка тортилгани аниқланди.

Коррупциявий жиноят содир этганлиги учун судланганларнинг энг кўпи таълим (813 нафар), соғлиқни сақлаш (384 нафар) ва банк (381 нафар) соҳаларига тўғри келади.

Жиноятлар таҳлилига кўра, 2022 йилда коррупцияга оид жиноятлар содир этганларнинг 1 234 нафари муқаддам судланган шахслар бўлиб, уларнинг 506 нафари муқаддам коррупциявий жинояти учун судланган.

Коррупцияга қарши курашиш агентлиги

Ахборот хизмати