Ўзбекистон Республикаси Президентининг 2021 йил 16 июндаги  ПФ-6247-сон Фармони билан Қорақалпоғистон Республикаси Жўқорғи Кенгеси, халқ депутатлари вилоят, туман, шаҳар Кенгаши сессияларини телеканаллар, шунингдек, Интернет тармоғи орқали жонли эфирга узатишни таъминлаш белгиланган.

Шунга кўра, мазкур тартибнинг маҳаллий кенгашлар томонидан 2023 йил биринчи ярим йиллигида ижро этилиши ҳолати таҳлил қилинди.

Ўрганиш давомида Қорақалпоғистон Республикаси Жўқорғи Кенгеси, халқ депутатлари вилоятлар ва Тошкент шаҳар Кенгашлари томонидан тақдим этилган маълумотларнинг ҳаққонийлиги, яъни Кенгаш сессиялари (ёпиқ мажлислар бундан мустасно) муҳокамасига киритилган кун тартибидаги ҳар бир масала ҳамда узлуксиз жонли эфирга узатилиш ҳолатларига алоҳида эътибор қаратилди.

Бунда сессиялар тўғрисида эълон қилинган қисқа хабарлар ёки фото ва видеорепортажлар фармон талаблари ижросини таъминламаганлик сифатида баҳоланди.

Шунингдек, масофавий мониторинг тартибида трансляцияларнинг сифати ва тўлиқлиги ўрганилди.

Аниқланишича, 2023 йил 6 ой давомида Қорақалпоғистон Республикаси Жўқорғи Кенгеси, халқ депутатлари вилоятлар ва Тошкент шаҳар Кенгашлари томонидан жами 102 та сессия ўтказилган. Улардан 40, яъни 39 фоизи маҳаллий телеканаллар ёки Интернет тармоғи орқали жонли эфирга узатилган.

Мисол учун, халқ депутатлари Хоразм, Жиззах, Наманган, Фарғона вилояти ва Тошкент шаҳар кенгашлари томонидан 2023 йил 6 ой давомида ўтказилган бирорта сессия жонли эфирга узатилмаган.

Ўрганиш давомида жонли эфирга узатилмаган сессиялар аксарияти вилоят ҳокимлигининг расмий веб-сайти ёки ижтимоий тармоқлардаги расмий саҳифаларида (facebook, instagram, telegram) хабар ва янгилик  сифатида эълон қилиб келинганлиги маълум бўлди.

Шунингдек, ўрганиш давомида халқ депутатлари шаҳар ва туман Кенгашлари сессияларининг жонли эфирга узатилиши ҳолати ҳам таҳлил қилинди.

Аниқланишича, 2023 йил биринчи ярим йиллигида халқ депутатлари шаҳар ва туман Кенгашлари томонидан Республика бўйича жами 1676 та сессия ўтказилган бўлиб, улардан 405 таси, яъни 24 фоизи маҳаллий телеканаллар ёки Интернет тармоғи орқали жонли эфирга узатилган.

Жумладан, Фарғона вилоятида 16 та (Бағдод, Данғара, Фарғона т., Фарғона ш., Фурқат, Марғилон ш., Ўзбекистон, Қўқон, Олтиариқ, Қўштепа, Қувасой ш., Ёзёвон, Қува, Риштон, Сўх, Учкўприк), Тошкент вилоятида 13 та (Ангрен ш., Бўка, Чиноз, Чирчиқ ш., Нурафшон ш., Оққўрғон, Паркент, Қуйи Чирчиқ, Тошкент т., Янгийўл ш., Янгийўл, Юқори Чирчиқ, Зангиота), Наманган вилоятида 11 та (Давлатобод, Косонсой, Мингбулоқ, Наманган т, Норин, Поп, Тўрақўрғон, Учқўрғон, Чортоқ, Чуст, Наманган ш.), Тошкент шаҳрида 11 та (Бектемир, Чилонзор, Миробод, Мирзо Улуғбек, Олмазор, Сирғари, Шайхонтоҳур, Учтепа, Яккасарой, Янгиҳаёт, Юнусобод), Хоразм вилоятида 10 та (Боғот, Гурлан, Қўшкўпир,  Шовот, Урганч ш., Урганч, Хива ш. Хива, Янгиобод, Янгибозор), Андижон вилоятида 10 та (Хонобод ш., Андижон т., Асака, Балиқчи, Булоқбоши, Бўстон, Хўжаобод, Қўрғонтепа, Улуғнор, Пахтаобод), Жиззах вилоятида 6 та (Шароф Рашидов, Ғаллаорол, Зомин, Зарбдор, Жиззах ш., Пахтакор), Қашқадарё вилоятида 6 та (Ғузор, Китоб, Қарши ш., Нишон, Косон, Яккабоғ), Бухоро вилоятида 5 та (Бухоро ш., Шофиркон, Жондор, Пешку, Когон), Қорақалпоғистон Республикасида 5 та (Нукус шаҳар, Қораўзак, Тахиатош, Тўрткўл, Хўжайли), Сирдарё вилоятида 4 та (Гулистон ш., Оқолтин, Сайхунобод, Сирдарё т.),Навоий вилоятида 3 та (Ғозғон ш, Кармана, Томди), Сурхондарё вилоятида 1 та (Сариосиё), Самарқанд вилоятида 1 та (Булунғур) халқ депутатлари туман ва шаҳар Кенгашлари умуман жонли трансляция қилмагани маълум бўлди.

Жонли эфирга узатилмаган аксарият сессияларни туман (шаҳар) ҳокимлиги расмий веб-сайт ёки ижтимоий тармоқлардаги расмий саҳифаларда (facebook, instagram, telegram) хабар ва янгиликлар шаклида эълон қилиш билан кифояланган.  

Коррупцияга қарши курашиш агентлиги

Ахборот хизмати