O‘zbekiston Respublikasi Prezidentining 2021-yil 16-iyundagi PF-6247-son Farmoni bilan Qoraqalpog‘iston Respublikasi Jo‘qorg‘i Kengesi, xalq deputatlari viloyat, tuman, shahar Kengashi sessiyalarini telekanallar, shuningdek, Internet tarmog‘i orqali jonli efirga uzatishni taʼminlash belgilangan.

Shunga ko‘ra, mazkur tartibning mahalliy kengashlar tomonidan 2023 yil birinchi yarim yilligida ijro etilishi holati tahlil qilindi.

O‘rganish davomida Qoraqalpog‘iston Respublikasi Jo‘qorg‘i Kengesi, xalq deputatlari viloyatlar va Toshkent shahar Kengashlari tomonidan taqdim etilgan maʼlumotlarning haqqoniyligi, yaʼni Kengash sessiyalari (yopiq majlislar bundan mustasno) muhokamasiga kiritilgan kun tartibidagi har bir masala hamda uzluksiz jonli efirga uzatilish holatlariga alohida eʼtibor qaratildi.

Bunda sessiyalar to‘g‘risida eʼlon qilingan qisqa xabarlar yoki foto va videoreportajlar farmon talablari ijrosini taʼminlamaganlik sifatida baholandi.

Shuningdek, masofaviy monitoring tartibida translyatsiyalarning sifati va to‘liqligi o‘rganildi.

Aniqlanishicha, 2023-yil 6 oy davomida Qoraqalpog‘iston Respublikasi Jo‘qorg‘i Kengesi, xalq deputatlari viloyatlar va Toshkent shahar Kengashlari tomonidan jami 102 ta sessiya o‘tkazilgan. Ulardan 40, yaʼni 39 foizi mahalliy telekanallar yoki Internet tarmog‘i orqali jonli efirga uzatilgan.

Misol uchun, xalq deputatlari Xorazm, Jizzax, Namangan, Farg‘ona viloyati va Toshkent shahar kengashlari tomonidan 2023-yil 6 oy davomida o‘tkazilgan birorta sessiya jonli efirga uzatilmagan.

O‘rganish davomida jonli efirga uzatilmagan sessiyalar aksariyati viloyat hokimligining rasmiy veb-sayti yoki ijtimoiy tarmoqlardagi rasmiy sahifalarida (facebook, instagram, telegram) xabar va yangilik  sifatida eʼlon qilib kelinganligi maʼlum bo‘ldi.

Shuningdek, o‘rganish davomida xalq deputatlari shahar va tuman Kengashlari sessiyalarining jonli efirga uzatilishi holati ham tahlil qilindi.

Aniqlanishicha, 2023-yil birinchi yarim yilligida xalq deputatlari shahar va tuman Kengashlari tomonidan Respublika bo‘yicha jami 1676 ta sessiya o‘tkazilgan bo‘lib, ulardan 405 tasi, yaʼni 24 foizi mahalliy telekanallar yoki Internet tarmog‘i orqali jonli efirga uzatilgan.

Jumladan, Farg‘ona viloyatida 16 ta (Bag‘dod, Dang‘ara, Farg‘ona t., Farg‘ona sh., Furqat, Marg‘ilon sh., O‘zbekiston, Qo‘qon, Oltiariq, Qo‘shtepa, Quvasoy sh., Yozyovon, Quva, Rishton, So‘x, Uchko‘prik), Toshkent viloyatida 13 ta (Angren sh., Bo‘ka, Chinoz, Chirchiq sh., Nurafshon sh., Oqqo‘rg‘on, Parkent, Quyi Chirchiq, Toshkent t., Yangiyo‘l sh., Yangiyo‘l, Yuqori Chirchiq, Zangiota), Namangan viloyatida 11 ta (Davlatobod, Kosonsoy, Mingbuloq, Namangan t, Norin, Pop, To‘raqo‘rg‘on, Uchqo‘rg‘on, Chortoq, Chust, Namangan sh.), Toshkent shahrida 11 ta (Bektemir, Chilonzor, Mirobod, Mirzo Ulug‘bek, Olmazor, Sirg‘ari, Shayxontohur, Uchtepa, Yakkasaroy, Yangihayot, Yunusobod), Xorazm viloyatida 10 ta (Bog‘ot, Gurlan, Qo‘shko‘pir,  Shovot, Urganch sh., Urganch, Xiva sh. Xiva, Yangiobod, Yangibozor), Andijon viloyatida 10 ta (Xonobod sh., Andijon t., Asaka, Baliqchi, Buloqboshi, Bo‘ston, Xo‘jaobod, Qo‘rg‘ontepa, Ulug‘nor, Paxtaobod), Jizzax viloyatida 6 ta (Sharof Rashidov, G‘allaorol, Zomin, Zarbdor, Jizzax sh., Paxtakor), Qashqadaryo viloyatida 6 ta (G‘uzor, Kitob, Qarshi sh., Nishon, Koson, Yakkabog‘), Buxoro viloyatida 5 ta (Buxoro sh., Shofirkon, Jondor, Peshku, Kogon), Qoraqalpog‘iston Respublikasida 5 ta (Nukus shahar, Qorao‘zak, Taxiatosh, To‘rtko‘l, Xo‘jayli), Sirdaryo viloyatida 4 ta (Guliston sh., Oqoltin, Sayxunobod, Sirdaryo t.), Navoiy viloyatida 3 ta (G‘ozg‘on sh, Karmana, Tomdi), Surxondaryo viloyatida 1 ta (Sariosiyo), Samarqand viloyatida 1 ta (Bulung‘ur) xalq deputatlari tuman va shahar Kengashlari umuman jonli translyatsiya qilmagani maʼlum bo‘ldi.

Jonli efirga uzatilmagan aksariyat sessiyalarni tuman (shahar) hokimligi rasmiy veb-sayt yoki ijtimoiy tarmoqlardagi rasmiy sahifalarda (facebook, instagram, telegram) xabar va yangiliklar shaklida eʼlon qilish bilan kifoyalangan.  

Korrupsiyaga qarshi kurashish agentligi

Axborot xizmati