Давлат буюртмачилари томонидан амалга оширилаётган харидларни масофавий мониторинг тартибида ўрганиш мобайнида:

➖“2-кўприкқурилиш отряди” унитар корхонаси буюртмачилигида 2023 йил 18 июль куни ўтказилган 868,5 млн  сўмлик “Қолип (опалубка) эҳтиёт қисмлари харид қилиш”;

➖Самарқанд йўловчитранс давлат корхонаси томонидан 2023 йил 6 июнь куни ўтказилган 494,0 млн сўмлик “40 та автобекатларга ўрнатилган ЛЕД дисплейларни қабул қилиш карталари ва электрон модулларини кўчайтириш хизмати”;

➖Қува тумани 62-ихтисослаштирилган давлат умумтаълим мактаб-интернати буюртмачилигида 2023 йил 10 июль куни ўтказилган 200,0 млн сўмлик “Қуёш панеллари етказиб, ўрнатиб бериш хизмати”;

➖Паяриқ туман тиббиёт бирлашмаси томонидан 2023 йил 24 июль куни ўтказилган 300,0 млн сўмлик “Генератор харид қилиш”;

➖Булунғур туманидаги 9-сонли болалар мусиқа ва санъат мактаби буюртмачилигида 2023 йил 26 июль 42 млн сўмлик “Эмульция ва краска сотиб олиш” юзасидан ўтказилган давлат харидларида қатор қонунбузилиши ҳолатларига йўл қўйилганлиги аниқланди.

Хусусан, ушбу харидларда иштирок этган талабгорларнинг ҳужжатлари харид комиссияси аъзолари фойдаланган қурилмалар (IP-манзиллари бир хил) орқали электрон платформага юкланган ҳамда иштирокчиларнинг таклифлари харид қилиш ҳужжатларида кўрсатилган баҳолаш мезонларига зид равишда баҳоланган. 

Натижада Ўзбекистон Республикаси “Давлат харидлари тўғрисида”ги Қонуннинг 10-моддаси (рақобат ва холислик принципи), 14-моддаси (манфаатлар тўқнашуви), 20-моддаси (харид комиссиясининг ҳуқуқ ва мажбуриятлари), 46-моддаси (давлат харидлари жараёнидаги чекловлар) ҳамда Ўзбекистон Республикаси Вазирлар Маҳкамасининг “Давлат харидларини амалга ошириш билан боғлиқ тартиб-таомилларни ташкил этиш ва ўтказиш тартиби тўғрисида”ги Қарори билан тасдиқланган Низомнинг бир қатор талабларига амал қилинмаган.   

Мазкур ҳолатлар бўйича Агентлик томонидан харид комиссияларининг баённомаларини бекор қилиш тўғрисида буюртмачиларга тақдимномалар киритилган ҳолда қонунбузилиш ҳолатларии бартараф этилиши таъминланди.  

Шунингдек, ушбу ҳолатлар юзасидан тўпланган ҳужжатлар қонуний қарор қабул қилиш учун Бош прокуратура ҳузуридаги Иқтисодий жиноятларга қарши курашиш департаментига юборилди.

Агентлик томонидан давлат буюртмачилари томонидан амалга оширилаётган харидларда қонунчилик талабларига риоя қилиниши ҳолатларини мониторинг қилиш ишлари давом эттирилмоқда.

Коррупцияга қарши курашиш агентлиги

Ахборот хизмати