Davlat buyurtmachilari tomonidan amalga oshirilayotgan xaridlarni masofaviy monitoring tartibida o‘rganish mobaynida:

➖“2-ko‘prikqurilish otryadi” unitar korxonasi buyurtmachiligida 2023-yil 18-iyul kuni o‘tkazilgan 868,5 mln  so‘mlik “Qolip (opalubka) ehtiyot qismlari xarid qilish”;

➖Samarqand yo‘lovchitrans davlat korxonasi tomonidan 2023-yil 6-iyun kuni o‘tkazilgan 494,0 mln so‘mlik “40 ta avtobekatlarga o‘rnatilgan LED displeylarni qabul qilish kartalari va elektron modullarini ko‘chaytirish xizmati”;

➖Quva tumani 62-ixtisoslashtirilgan davlat umumtaʼlim maktab-internati buyurtmachiligida 2023-yil 10-iyul kuni o‘tkazilgan 200,0 mln so‘mlik “Quyosh panellari yetkazib, o‘rnatib berish xizmati”;

➖Payariq tuman tibbiyot birlashmasi tomonidan 2023-yil 24-iyul kuni o‘tkazilgan 300,0 mln so‘mlik “Generator xarid qilish”;

➖Bulung‘ur tumanidagi 9-sonli bolalar musiqa va sanʼat maktabi buyurtmachiligida 2023-yil 26-iyul 42 mln so‘mlik “Emulsiya va kraska sotib olish” yuzasidan o‘tkazilgan davlat xaridlarida qator qonunbuzilishi holatlariga yo‘l qo‘yilganligi aniqlandi.

Xususan, ushbu xaridlarda ishtirok etgan talabgorlarning hujjatlari xarid komissiyasi aʼzolari foydalangan qurilmalar (IP-manzillari bir xil) orqali elektron platformaga yuklangan hamda ishtirokchilarning takliflari xarid qilish hujjatlarida ko‘rsatilgan baholash mezonlariga zid ravishda baholangan. 

Natijada O‘zbekiston Respublikasi “Davlat xaridlari to‘g‘risida”gi Qonunning 10-moddasi (raqobat va xolislik prinsipi), 14-moddasi (manfaatlar to‘qnashuvi), 20-moddasi (xarid komissiyasining huquq va majburiyatlari), 46-moddasi (davlat xaridlari jarayonidagi cheklovlar) hamda O‘zbekiston Respublikasi Vazirlar Mahkamasining “Davlat xaridlarini amalga oshirish bilan bog‘liq tartib-taomillarni tashkil etish va o‘tkazish tartibi to‘g‘risida”gi Qarori bilan tasdiqlangan Nizomning bir qator talablariga amal qilinmagan.   

Mazkur holatlar bo‘yicha Agentlik tomonidan xarid komissiyalarining bayonnomalarini bekor qilish to‘g‘risida buyurtmachilarga taqdimnomalar kiritilgan holda qonunbuzilish holatlarii bartaraf etilishi taʼminlandi.  

Shuningdek, ushbu holatlar yuzasidan to‘plangan hujjatlar qonuniy qaror qabul qilish uchun Bosh prokuratura huzuridagi Iqtisodiy jinoyatlarga qarshi kurashish departamentiga yuborildi.

Agentlik tomonidan davlat buyurtmachilari tomonidan amalga oshirilayotgan xaridlarda qonunchilik talablariga rioya qilinishi holatlarini monitoring qilish ishlari davom ettirilmoqda.

Korrupsiyaga qarshi kurashish agentligi

Axborot xizmati