Бугун, Коррупцияга қарши курашиш агентлигида Қатар давлати Қонун устуворлиги ва коррупцияга қарши кураш маркази Васийлар кенгаши раиси, БМТнинг коррупциянинг олдини олиш бўйича махсус адвокати Али бин Ал-Маррий раҳбарлигидаги делегацияси билан учрашув бўлиб ўтди.  

Учрашувдан кўзланган асосий мақсад - қатарлик ҳамкорлар билан коррупцияга қарши курашиш ва қонун устуворлигини таъминлаш йўналишида ўзаро тажриба алмашиш ва ҳамкорлик истиқболларини белгилаб олишдан иборат.

Учрашув давомида Али бин ал-Маррий давлатимиз раҳбарининг сиёсий иродаси билан мазкур соҳада амалга оширилаётган муҳим чора-тадбирларни юқори баҳолаб, Ўзбекистоннинг минтақа мамлакатлари орасида соҳада сезиларли ижобий натижаларга эришаётгани, бу эса коррупцияга қарши курашишга оид халқаро рейтинг ва индекслардаги ўрни йилдан-йилга кўтарилаётганида акс этаётганини ҳам алоҳида эътироф этди. 

Шунингдек, мулоқот доирасида коррупцияга қарши курашиш соҳасида таъсис этилган махсус халқаро мукофотнинг тақдирлаш маросимларининг навбатдагисини Ўзбекистонда ташкил этиш масаласи муҳокама қилинди.   

Агентлик директори А.Бурханов бундай муҳим тадбирнинг мамлакатимизда ўтказилиши ҳамда Ўзбекистон коррупцияга қарши курашиш бўйича етакчи хорижий ва халқаро экспертлар, жамоатчилик фаоллари учун ўзаро мулоқот майдонига айланиши дунё ҳамжамиятининг коррупцияга қарши курашишдаги саъй-ҳаракатларини янада бирлаштириш ва кучайтиришга ҳисса қўшишидан мамнун эканлигини алоҳида  қайд этди.  

Шундан сўнг томонлар ўртасида келгусида коррупцияга қарши курашиш соҳасида тажриба алмашиш, Агентлик ходимларининг салоҳияти ва малакасини оширишга қаратилган ўқув дастурлар, стажировка ҳамда қўшма лойиҳаларни амалга ошириш ҳамда бошқа йўналишларда ҳамкорлик қилиш масалаларида музокаралар ўтказилди. 

Шунингдек, жорий йилнинг сентябрь ойида Ўзбекистон делегациясининг Қатар давлатига ташрифини ташкил этиш, ташриф доирасида Қатар давлатининг коррупцияга қарши курашишга масъул бўлган бир қатор давлат идоралари билан ўзаро ҳамкорлик истиқболларини муҳокама қилишга келишиб олинди.  

Учрашув якунида икки томон ўртасида самарали ҳамкорлик йўлга қўйилиши мамлакатларимиз учун бирдай манфаатли эканлиги таъкидланди.

Коррупцияга қарши курашиш агентлиги

Ахборот хизмати