Bugun, Korrupsiyaga qarshi kurashish agentligida Qatar davlati Qonun ustuvorligi va korrupsiyaga qarshi kurash markazi Vasiylar kengashi raisi, BMTning korrupsiyaning oldini olish bo‘yicha maxsus advokati Ali bin Al-Marriy rahbarligidagi delegatsiyasi bilan uchrashuv bo‘lib o‘tdi.  
​​​​​​

Uchrashuvdan ko‘zlangan asosiy maqsad - qatarlik hamkorlar bilan korrupsiyaga qarshi kurashish va qonun ustuvorligini taʼminlash yo‘nalishida o‘zaro tajriba almashish va hamkorlik istiqbollarini belgilab olishdan iborat.

Uchrashuv davomida Ali bin al-Marriy davlatimiz rahbarining siyosiy irodasi bilan mazkur sohada amalga oshirilayotgan muhim chora-tadbirlarni yuqori baholab, O‘zbekistonning mintaqa mamlakatlari orasida sohada sezilarli ijobiy natijalarga erishayotgani, bu esa korrupsiyaga qarshi kurashishga oid xalqaro reyting va indekslardagi o‘rni yildan-yilga ko‘tarilayotganida aks etayotganini ham alohida eʼtirof etdi. 

Shuningdek, muloqot doirasida korrupsiyaga qarshi kurashish sohasida taʼsis etilgan maxsus xalqaro mukofotning taqdirlash marosimlarining navbatdagisini O‘zbekistonda tashkil etish masalasi muhokama qilindi.   

Agentlik direktori A.Burxanov bunday muhim tadbirning mamlakatimizda o‘tkazilishi hamda O‘zbekiston korrupsiyaga qarshi kurashish bo‘yicha yetakchi xorijiy va xalqaro ekspertlar, jamoatchilik faollari uchun o‘zaro muloqot maydoniga aylanishi dunyo hamjamiyatining korrupsiyaga qarshi kurashishdagi saʼy-harakatlarini yanada birlashtirish va kuchaytirishga hissa qo‘shishidan mamnun ekanligini alohida  qayd etdi.  

Shundan so‘ng tomonlar o‘rtasida kelgusida korrupsiyaga qarshi kurashish sohasida tajriba almashish, Agentlik xodimlarining salohiyati va malakasini oshirishga qaratilgan o‘quv dasturlar, stajirovka hamda qo‘shma loyihalarni amalga oshirish hamda boshqa yo‘nalishlarda hamkorlik qilish masalalarida muzokaralar o‘tkazildi. 

Shuningdek, joriy yilning sentyabr oyida O‘zbekiston delegatsiyasining Qatar davlatiga tashrifini tashkil etish, tashrif doirasida Qatar davlatining korrupsiyaga qarshi kurashishga masʼul bo‘lgan bir qator davlat idoralari bilan o‘zaro hamkorlik istiqbollarini muhokama qilishga kelishib olindi.  

Uchrashuv yakunida ikki tomon o‘rtasida samarali hamkorlik yo‘lga qo‘yilishi mamlakatlarimiz uchun birday manfaatli ekanligi taʼkidlandi.

Korrupsiyaga qarshi kurashish agentligi

Axborot xizmati