Коррупцияга қарши курашиш агентлиги томонидан давлат буюртмачилари амалга ошираётган харидларда қонунчилик талабларига риоя қилиниши ҳолатларини мониторинг қилиш ишлари давом эттирилмоқда.

Масофавий мониторинг тадбирларида айрим давлат буюртмачилари томонидан бир қатор қонунбузилиши ҳолатларига йўл қўйилганлиги аниқланди.

Жумладан, Зафаробод туман болалар ва ўсмирлар спорт мактаби буюртмачилигида 2023 йил 2 август куни ўтказилган 286,0 млн сўмлик спорт инвентарлари харид қилиш;

Қорақалпоғистон Республикаси Жўқорғи кенгеси томонидан 2023 йил 4 август куни ўтказилган 912,4 млн сўмлик ёзги мажлислар учун чарм томли шийпон қуриш;

Ўзбекистон Республикаси мактабгача ва мактаб таълими вазирлиги ҳузуридаги ихтисослаштирилган таълим муассасалар агентлиги тизимидаги Самарқанд шаҳридаги Президент мактаби буюртмачилигида 2023 йил 5 август куни ўтказилган 311,8 млн сўмлик мактаб формалари харид қилиш;

Қизилтепа туман йўллардан фойдаланиш унитар корхонаси томонидан 2023 йил 10 август куни ўтказилган 300,0 млн сўмлик транспортда юк ташиш хизмати кўрсатиш юзасидан ўтказилган давлат харидларида қонунчиликка зид ҳолатлар аниқланди.

Жумладан, ушбу давлат харидларида Ўзбекистон Республикаси “Давлат харидлари тўғрисида”ги Қонуннинг 10-моддаси (рақобат ва холислик принципи), 14-моддаси (манфаатлар тўқнашуви), 20-моддаси (харид комиссиясининг ҳуқуқ ва мажбуриятлари), 46-моддаси (давлат харидлари жараёнидаги чекловлар) ҳамда Ўзбекистон Республикаси Вазирлар Маҳкамасининг “Давлат харидларини амалга ошириш билан боғлиқ тартиб-таомилларни ташкил этиш ва ўтказиш тартиби тўғрисида”ги Қарори билан тасдиқланган Низомнинг бир қатор талабларига амал қилинмаган.  

Хусусан, ушбу харидларда иштирок этган талабгорларнинг ҳужжатлари харид комиссияси аъзолари фойдаланган қурилмалар (IP-манзиллари бир хил) орқали электрон платформага юкланган ҳамда айрим иштирокчиларнинг таклифлари харид қилиш ҳужжатларида кўрсатилган баҳолаш мезонларига зид равишда баҳоланган. 

Мазкур ҳолатлар бўйича Агентлик томонидан харид комиссияларининг баённомаларини бекор қилиш тўғрисида буюртмачиларга тақдимномалар киритилиб, қонунбузилиши ҳолатлари бартараф этилди.  

Изоҳ: Агентлик томонидан Самарқанд шаҳридаги Президент мактаби буюртмачилигида ўтказилган танловда давлат хариди тартиб-таомилларига оид камчиликларнинг олди олиниб, танлов ғолибига маблағлар ўтказилиб берилмасдан харид натижалари (баённома ва шартнома) бекор қилинган.

Шуни алоҳида таъкидлаш жоизки, Самарқанд шаҳридаги Президент мактаби мансабдор шахслари томонидан маблағлар ўзлаштирилиши ҳолати аниқланмаган.

Коррупцияга қарши курашиш агентлиги 
Ахборот хизмати