Korrupsiyaga qarshi kurashish agentligi tomonidan davlat buyurtmachilari amalga oshirayotgan xaridlarda qonunchilik talablariga rioya qilinishi holatlarini monitoring qilish ishlari davom ettirilmoqda.

Masofaviy monitoring tadbirlarida ayrim davlat buyurtmachilari tomonidan bir qator qonunbuzilishi holatlariga yo‘l qo‘yilganligi aniqlandi.

Jumladan, Zafarobod tuman bolalar va o‘smirlar sport maktabi buyurtmachiligida 2023-yil 2-avgust kuni o‘tkazilgan 286,0 mln so‘mlik sport inventarlari xarid qilish;

Qoraqalpog‘iston Respublikasi Jo‘qorg‘i kengesi tomonidan 2023-yil 4-avgust kuni o‘tkazilgan 912,4 mln so‘mlik yozgi majlislar uchun charm tomli shiypon qurish;

O‘zbekiston Respublikasi maktabgacha va maktab taʼlimi vazirligi huzuridagi ixtisoslashtirilgan taʼlim muassasalar agentligi tizimidagi Samarqand shahridagi Prezident maktabi buyurtmachiligida 2023-yil 5-avgust kuni o‘tkazilgan 311,8 mln so‘mlik maktab formalari xarid qilish;

Qiziltepa tuman yo‘llardan foydalanish unitar korxonasi tomonidan 2023-yil10-avgust kuni o‘tkazilgan 300,0 mln so‘mlik transportda yuk tashish xizmati ko‘rsatish yuzasidan o‘tkazilgan davlat xaridlarida qonunchilikka zid holatlar aniqlandi.

Jumladan, ushbu davlat xaridlarida O‘zbekiston Respublikasi “Davlat xaridlari to‘g‘risida”gi Qonunning 10-moddasi (raqobat va xolislik prinsipi), 14-moddasi (manfaatlar to‘qnashuvi), 20-moddasi (xarid komissiyasining huquq va majburiyatlari), 46-moddasi (davlat xaridlari jarayonidagi cheklovlar) hamda O‘zbekiston Respublikasi Vazirlar Mahkamasining “Davlat xaridlarini amalga oshirish bilan bog‘liq tartib-taomillarni tashkil etish va o‘tkazish tartibi to‘g‘risida”gi Qarori bilan tasdiqlangan Nizomning bir qator talablariga amal qilinmagan.  

Xususan, ushbu xaridlarda ishtirok etgan talabgorlarning hujjatlari xarid komissiyasi aʼzolari foydalangan qurilmalar (IP-manzillari bir xil) orqali elektron platformaga yuklangan hamda ayrim ishtirokchilarning takliflari xarid qilish hujjatlarida ko‘rsatilgan baholash mezonlariga zid ravishda baholangan. 

Mazkur holatlar bo‘yicha Agentlik tomonidan xarid komissiyalarining bayonnomalarini bekor qilish to‘g‘risida buyurtmachilarga taqdimnomalar kiritilib, qonunbuzilishi holatlari bartaraf etildi.  

Izoh: Agentlik tomonidan Samarqand shahridagi Prezident maktabi buyurtmachiligida o'tkazilgan tanlovda davlat xaridi tartib-taomillariga oid kamchiliklarning oldi olinib, tanlov g'olibiga mablag'lar o'tkazilib berilmasdan xarid natijalari (bayonnoma va shartnoma) bekor qilingan.

Shuni alohida taʼkidlash joizki, Samarqand shahridagi Prezident maktabi mansabdor shaxslari tomonidan mablag‘lar o'zlashtirilishi holati aniqlanmagan.

Korrupsiyaga qarshi kurashish agentligi 
Axborot xizmati