Жорий йилнинг 30 август куни Коррупцияга қарши курашиш агентлигида Агентлик раҳбарияти ва ходимлари иштирокида Ўзбекистон Республикаси мустақиллигининг ўттиз икки йиллиги муносабати билан  “Янги ҳаёт учун, янги Ўзбекистон учун!”  шиори остида байрам тадбири бўлиб ўтди.

Тадбир аввалида Агентлик директори A.Burxanov барчани энг улуғ, энг азиз айём билан самимий табриклаб, ривожланишнинг янги даврига дадил қадам қўяётган Ўзбекистоннинг миллий тараққиётида коррупцияга қарши муросасиз курашишга қаратилган изчил ислоҳотлар тобора муҳим аҳамият касб этиб бораётганини алоҳида таъкидлаб ўтди. 

Хусусан, коррупцияга қарши курашиш билан боғлиқ нормалар янгиланган конституцияда ҳам мустаҳкамлангани бунинг ёрқин далилидир.

Қолаверса, давлатимиз раҳбарининг сиёсий иродаси билан мазкур соҳада амалга оширилаётган муҳим чора-тадбирлар самарасида сезиларли ижобий натижаларга эришилаётгани,  бу эса коррупцияга қарши курашишга оид халқаро рейтинг ва индексларда мамлакатимиз кўрсаткичлари мунтазам яхшиланиб бораётгани мисолида ўз исботини топаётгани ва буларнинг барида Агентлик жамоасининг муносиб ҳиссаси борлиги  мамнуният билан эътироф этилди.  

Шунингдек, тадбир мобайнида билдирилган фикрларда коррупциядан холи жамият барпо этиш йўлида халқимизнинг юксак ишончини оқлаш, эришган ютуқларимизни янги, янада улкан натижалар билан мустаҳкамлаш Агентлик жамоасининг бош вазифаси бўлиб қолишига алоҳида урғу берилди.

Байрам тадбири давомида муносабати билан хизмат вазифаларини самарали ва виждонан бажарганлиги, ташаббускорлиги, шунингдек, жамоат ишларида фаол иштирок этганлиги учун Агентликнинг бир гуруҳ ходимлари фахрий ёрлиқ ҳамда ташаккурнома билан тақдирланди. 

Бундан ташқари, мамлакатимиз мустақиллигининг 32 йиллиги олдидан Агентлик директорининг соврини учун ўтказилган спорт мусобақасининг ғолиб ва совриндорларига ҳам совғалар топширилди.  

Коррупцияга қарши курашиш агентлиги

Ахборот хизмати