Joriy yilning 30-avgust kuni Korrupsiyaga qarshi kurashish agentligida Agentlik rahbariyati va xodimlari ishtirokida O‘zbekiston Respublikasi mustaqilligining o‘ttiz ikki yilligi munosabati bilan  “Yangi hayot uchun, yangi O‘zbekiston uchun!”  shiori ostida bayram tadbiri bo‘lib o‘tdi.

Tadbir avvalida Agentlik direktori A.Burxanov barchani eng ulug‘, eng aziz ayyom bilan samimiy tabriklab, rivojlanishning yangi davriga dadil qadam qo‘yayotgan O‘zbekistonning milliy taraqqiyotida korrupsiyaga qarshi murosasiz kurashishga qaratilgan izchil islohotlar tobora muhim ahamiyat kasb etib borayotganini alohida taʼkidlab o‘tdi. 

Xususan, korrupsiyaga qarshi kurashish bilan bog'liq normalar yangilangan konstitutsiyada ham mustahkamlangani buning yorqin dalilidir.

Qolaversa, davlatimiz rahbarining siyosiy irodasi bilan mazkur sohada amalga oshirilayotgan muhim chora-tadbirlar samarasida sezilarli ijobiy natijalarga erishilayotgani,  bu esa korrupsiyaga qarshi kurashishga oid xalqaro reyting va indekslarda mamlakatimiz ko‘rsatkichlari muntazam yaxshilanib borayotgani misolida o‘z isbotini topayotgani va bularning barida Agentlik jamoasining munosib hissasi borligi  mamnuniyat bilan eʼtirof etildi.  

Shuningdek, tadbir mobaynida bildirilgan fikrlarda korrupsiyadan xoli jamiyat barpo etish yo‘lida xalqimizning yuksak ishonchini oqlash, erishgan yutuqlarimizni yangi, yana-da ulkan natijalar bilan mustahkamlash Agentlik jamoasining bosh vazifasi bo‘lib qolishiga alohida urg‘u berildi.

Bayram tadbiri davomida munosabati bilan xizmat vazifalarini samarali va vijdonan bajarganligi, tashabbuskorligi, shuningdek, jamoat ishlarida faol ishtirok etganligi uchun Agentlikning bir guruh xodimlari faxriy yorliq hamda tashakkurnoma bilan taqdirlandi. 

Bundan tashqari, mamlakatimiz mustaqilligining 32 yilligi oldidan Agentlik direktorining sovrini uchun o‘tkazilgan sport musobaqasining g‘olib va sovrindorlariga ham munosib sovg‘alar topshirildi.  

Korrupsiyaga qarshi kurashish agentligi

Axborot xizmati