Бугун Коррупцияга қарши курашиш агентлигида Япония Парламентининг Қонунчилик ва суд-ҳуқуқ масалалари қўмитаси раиси, “Япония – Ўзбекистон” парламентлараро гуруҳи аъзоси Тадахико Ито бошчилигидаги делегация билан учрашув бўлиб ўтди.

Учрашувдан кўзланган асосий мақсад - Ўзбекистон ва Япония ўртасида коррупцияга қарши курашиш соҳасида ҳамкорлик истиқболларини муҳокама қилишдан иборат.

Мулоқот аввалида А.Бурханов мамлакатимизда коррупцияга қарши курашиш бўйича давлат сиёсати ва соҳада амалга оширилаётган ислоҳотлар самарадорлигини янада оширишда халқаро стандартлар ҳамда илғор хорижий тажрибанинг долзарб эканлигига алоҳида урғу берди. 

Бу борада Япониянинг илғор тажрибасидан самарали фойдаланишга алоҳида эътибор қаратилаётгани, зеро, Япония вақт синовидан ўтган стратегик ҳамкор бўлиб, у билан муносабатлар ўзаро ишонч ва ҳурмат тамойиллари асосида тобора ривожланиб бораётганини мамнуният билан қайд этди.

Жумладан, 2022 йилда Агентлик делегациясининг Японияга сафари ташкил этилиб, Япония халқаро ҳамкорлик агентлиги (JICA), Нагоя университети, БМТнинг жиноятчиликнинг олдини олиш ва ҳуқуқбузарлар билан ишлаш бўйича Осиё ва Узоқ Шарқ институти (UNAFEI), Адлия вазирлиги каби қатор идора ва ташкилотлар билан ўзаро тажриба алмашилди. Қолаверса, ҳар йили кунчиқар мамлакатда ташкил этиб келинаётган "Жиноят ишларида коррупцияга қарши кураш" мавзусидаги халқаро семинарда Ўзбекистон вакиллари фаол иштирок этиб келишмоқда. 

Бугунги кунга қадар JICA вакиллари билан 2024 йилга мўлжалланган коррупцияга қарши курашиш бўйича техник лойиҳани ишлаб чиқиш ва амалга ошириш бўйича бир қатор учрашув ва музокаралар ўтказилди. 

Ўз навбатида, Тадахико Ито коррупцияга қарши курашиш соҳасида мамлакатларимиз ўртасидаги ҳамкорлик ва унинг самарасини юқори баҳолаб, ўзаро конструктив мулоқот ва ҳамкорликни изчил давом эттиришга тайёр эканлигини билдирди.   

Жумладан, давлат хизматида ҳалолликни таъминлаш, давлат хизматчиларини ўқитишни ташкил этиш, коррупцияга қарши самарали курашишга оид қонунчиликни такомиллаштириш каби бир қатор йўналишларда ўзаро ҳамкорликни амалга оширишнинг аниқ механизмларини ишлаб чиқиш, биргаликдаги вазифаларни белгилаб олиш мақсадида бу каби мулоқотларни келгусида давом эттиришга келишиб олинди.

Коррупцияга қарши курашиш агентлиги

Ахборот хизмати