Bugun Korrupsiyaga qarshi kurashish agentligida Yaponiya Parlamentining Qonunchilik va sud-huquq masalalari qo‘mitasi raisi, “Yaponiya – O‘zbekiston” parlamentlararo guruhi aʼzosi Tadaxiko Ito boshchiligidagi delegatsiya bilan uchrashuv bo‘lib o‘tdi.

Uchrashuvdan ko‘zlangan asosiy maqsad - O‘zbekiston va Yaponiya o‘rtasida korrupsiyaga qarshi kurashish sohasida hamkorlik istiqbollarini muhokama qilishdan iborat.

Muloqot avvalida A.Burxanov mamlakatimizda korrupsiyaga qarshi kurashish bo‘yicha davlat siyosati va sohada amalga oshirilayotgan islohotlar samaradorligini yanada oshirishda xalqaro standartlar hamda ilg‘or xorijiy tajribaning dolzarb ekanligiga alohida urg‘u berdi. 

Bu borada Yaponiyaning ilg‘or tajribasidan samarali foydalanishga alohida eʼtibor qaratilayotgani, zero, Yaponiya vaqt sinovidan o‘tgan strategik hamkor bo‘lib, u bilan munosabatlar o‘zaro ishonch va hurmat tamoyillari asosida tobora rivojlanib borayotganini mamnuniyat bilan qayd etdi.

Jumladan, 2022-yilda Agentlik delegatsiyasining Yaponiyaga safari tashkil etilib, Yaponiya xalqaro hamkorlik agentligi (JICA), Nagoya universiteti, BMTning jinoyatchilikning oldini olish va huquqbuzarlar bilan ishlash bo‘yicha Osiyo va Uzoq Sharq instituti (UNAFEI), Adliya vazirligi kabi qator idora va tashkilotlar bilan o‘zaro tajriba almashildi. Qolaversa, har yili kunchiqar mamlakatda tashkil etib kelinayotgan "Jinoyat ishlarida korrupsiyaga qarshi kurash" mavzusidagi xalqaro seminarda O‘zbekiston vakillari faol ishtirok etib kelishmoqda. 

Bugungi kunga qadar JICA vakillari bilan 2024-yilga mo‘ljallangan korrupsiyaga qarshi kurashish bo‘yicha texnik loyihani ishlab chiqish va amalga oshirish bo‘yicha bir qator uchrashuv va muzokaralar o‘tkazildi. 

O‘z navbatida, Tadaxiko Ito korrupsiyaga qarshi kurashish sohasida mamlakatlarimiz o‘rtasidagi hamkorlik va uning samarasini yuqori baholab, o‘zaro konstruktiv muloqot va hamkorlikni izchil davom ettirishga tayyor ekanligini bildirdi.   

Jumladan, davlat xizmatida halollikni taʼminlash, davlat xizmatchilarini o‘qitishni tashkil etish, korrupsiyaga qarshi samarali kurashishga oid qonunchilikni takomillashtirish kabi bir qator yo‘nalishlarda o‘zaro hamkorlikni amalga oshirishning aniq mexanizmlarini ishlab chiqish, birgalikdagi vazifalarni belgilab olish maqsadida bu kabi muloqotlarni kelgusida davom ettirishga kelishib olindi.

Korrupsiyaga qarshi kurashish agentligi

Axborot xizmati