Шу кунларда ижтимоий тармоқларда Ўзбекистон Республикаси Туризм қўмитаси ҳузуридаги “Milliy PR-markazi” давлат унитар корхонаси раҳбари Д.Самандарованинг тадбиркорлик фаолияти билан шуғулланиб келаётганига оид хабар кенг муҳокама қилинмоқда.

Коррупцияга қарши курашиш агентлиги томонидан мазкур ҳолат юзасидан ўрганиш ўтказилди ва натижаси бўйича қуйидагилар маълум қилинади:

Ўрганиш давомида Ўзбекистон Республикаси Туризм қўмитаси ҳузуридаги “Milliy PR-markazi” давлат унитар корхонаси раҳбари Самандарова Дилфуза Мансуровна 2023 йил 22 февралда давлат рўйхатидан ўтказилган “Avtoimkon trade” МЧЖда 50 фоизлик улуш билан таъсисчи эканлиги аниқланди.

Шунингдек, D.Samandarova ижтимоий тармоқ орқали Тошкент шаҳар марказида жойлашган ““LBOS Jewellery”” кумуш тақинчоқлар дўкони асосчиси эканлигини баён қилган ва ушбу дўконнинг ижобий хусусиятларини реклама қилган.

Ўзбекистон Республикасининг 2022йил 8 августдаги “Давлат фуқаролик хизмати тўғрисида”ги ЎРҚ-788-сон Қонунининг 13-моддасига асосан, давлат фуқаролик хизматчиси тадбиркорлик фаолияти субъектларини ташкил этишга, уларнинг муассиси (иштирокчиси) бўлишга, тадбиркорлик фаолияти субъектида ташкилий-бошқарув, маъмурий-хўжалик вазифаларини бажаришга ҳақли эмаслиги белгиланган.

Шунингдек, Ўзбекистон Республикаси Вазирлар Маҳкамасининг 2022 йил 14 октябрдаги “Давлат фуқаролик хизматчилари томонидан одоб-ахлоқ қоидаларига риоя этилишини таъминлаш бўйича қўшимча чора-тадбирлар тўғрисида”ги 595-сон қарор билан тасдиқланган “Давлат фуқаролик хизматчилари одоб-ахлоқининг намунавий қоидалари”нинг 13-бандида давлат хизматчилари ишдан ташқари вақтда тадбиркорлик ёки ҳақ тўланадиган бошқа фаолият билан (педагогик, илмий ва ижодий фаолиятдан ташқари) шуғулланмаслиги белгиланган.

Агентлик томонидан юқоридаги ҳолатларни бартараф этиш бўйича 2023 йил 19 сентябрь куни Ўзбекистон Республикаси Туризм қўмитаси ва унинг ҳузуридаги “Milliy PR-markazi” давлат унитар корхонасига тақдимнома киритилди.

Коррупцияга қарши курашиш агентлиги

Ахборот хизмати