Shu kunlarda ijtimoiy tarmoqlarda O‘zbekiston Respublikasi Turizm qo‘mitasi huzuridagi “Milliy PR-markazi” davlat unitar korxonasi rahbari D.Samandarovaning tadbirkorlik faoliyati bilan shug‘ullanib kelayotganiga oid xabar keng muhokama qilinmoqda.

Korrupsiyaga qarshi kurashish agentligi tomonidan mazkur holat yuzasidan o‘rganish o‘tkazildi va natijasi bo‘yicha quyidagilar maʼlum qilinadi: 

O‘rganish davomida O‘zbekiston Respublikasi Turizm qo‘mitasi huzuridagi “Milliy PR-markazi” davlat unitar korxonasi rahbari Samandarova Dilfuza Mansurovna 2023-yil 22-fevralda davlat ro‘yxatidan o‘tkazilgan “Avtoimkon trade” MCHJda 50 foizlik ulush bilan taʼsischi ekanligi aniqlandi.

Shuningdek,  D.Samandarova ijtimoiy tarmoq orqali Toshkent shahar markazida joylashgan ““LBOS Jewellery” kumush taqinchoqlar do‘koni asoschisi ekanligini bayon qilgan va ushbu do‘konning ijobiy xususiyatlarini reklama qilgan.

O‘zbekiston Respublikasining 2022yil 8-avgustdagi “Davlat fuqarolik xizmati to‘g‘risida”gi O‘RQ-788-son Qonunining 13-moddasiga asosan, davlat fuqarolik xizmatchisi tadbirkorlik faoliyati subyektlarini tashkil etishga, ularning muassisi (ishtirokchisi) bo‘lishga, tadbirkorlik faoliyati subyektida tashkiliy-boshqaruv, maʼmuriy-xo‘jalik vazifalarini bajarishga haqli emasligi belgilangan.

Shuningdek, O‘zbekiston Respublikasi Vazirlar Mahkamasining 2022-yil 14-oktabrdagi “Davlat fuqarolik xizmatchilari tomonidan odob-axloq qoidalariga rioya etilishini taʼminlash bo‘yicha qo‘shimcha chora-tadbirlar to‘g‘risida”gi 595-son qaror bilan tasdiqlangan “Davlat fuqarolik xizmatchilari odob-axloqining namunaviy qoidalari”ning 13-bandida davlat xizmatchilari ishdan tashqari vaqtda tadbirkorlik yoki haq to‘lanadigan boshqa faoliyat bilan (pedagogik, ilmiy va ijodiy faoliyatdan tashqari) shug‘ullanmasligi belgilangan.

Agentlik tomonidan yuqoridagi holatlarni bartaraf etish bo‘yicha 2023-yil 19-sentabr kuni O‘zbekiston Respublikasi Turizm qo‘mitasi va uning huzuridagi “Milliy PR-markazi” davlat unitar korxonasiga taqdimnoma kiritildi.

Korrupsiyaga qarshi kurashish agentligi

Axborot xizmati