Жорий йилнинг 11 октябрь куни Миср Араб Республикаси Маъмурий назорат идораси таклифига асосан Коррупцияга қарши курашиш агентлиги директори А.Бурханов бошчилигидаги Ўзбекистон делегациясининг Миср Араб Республикасига ташрифи бошланди.

Ташрифдан кўзланган асосий мақсад коррупцияга қарши курашиш соҳасида икки томонлама алоқаларни мустаҳкамлаш, икки давлат раҳбарининг учрашувларида мазкур йўналишда белгиланган вазифалар ижросини таъминлаш ҳамда ҳамкорликнинг асосий йўналишларини белгилаб олишдан иборат.

Делегация аъзолари дастлабки куни Миср Маъмурий назорат идорасида бўлишди.

Маълумот учун: Маъмурий назорат идораси (АCА) – бу Давлат органлари устидан маъмурий, молиявий назоратни амалга оширувчи Мисрнинг мустақил назорат органи. Ташкилот 1964 йилда ташкил этилган. Миср Маъмурий назорат идораси коррупцияга қарши курашиш, соҳага оид қонунчилик ва бошқа механизмларни ишлаб чиқиш, коррупцияга қарши ўқитиш ва кадрларни тайёрлаш, коррупциянинг олдини олиш ва унга қарши курашиш бўйича жамоатчилик хабардорлигини ошириш, халқаро стандартларни миллий қонунчиликка имплементацияни қилишга масъул орган ҳисобланади.

Учрашувда икки давлатда коррупцияга қарши курашиш борасида амалга оширилаётган ишлар тўғрисида маълумот берилди, ташкилотлар миқёсида доимий тажриба алмашиш механизмларини кўриб чиқиш ҳамда истиқболдаги режалар муҳокама қилинди.

Учрашувнинг асосий воқеаси томонлар ўртасида идоралараро Меморандумнинг имзолангани бўлди.

Мазкур меморандум касбий малака ошириш курсларини ташкил этиш, тажриба алмашиш ва кадрлар салоҳиятини ривожлантириш, коррупциянинг олдини олиш ва унга қарши курашиш бўйича маълумот ва профессионал материаллар алмашинувини йўлга қўйиш, қўшма форумлар, семинар ва тренинглар ўтказиш  каби бир қатор муҳим йўналишларда ўзаро ҳамкорликни назарда тутади.

Шунингдек, коррупциянинг олдини олиш ва унга қарши курашишда жамоатчилик иштирокини кенгайтириш мақсадида аҳолини коррупцияга қарши ўқитиш, уларнинг оммавий ахборот воситалари ва ҳалолликни тарғиб қилувчи кампаниялар орқали хабардорлигини ошириш бўйича маълумот алмашиш йўлга қўйилади.

Коррупцияга қарши курашиш агентлиги Акмал Бурханов ва Миср Маъмурий назорат идораси раҳбари Амр Адел Хосни мазкур келишув икки томон учун ҳам манфаатли бўлиши ва ўзаро ҳамкорликни  янги босқичга олиб чиқишини таъкидлашди.

Шундан сўнг Агентлик вакиллари учун Мисрда рақамлаштириш амалиёти, аксилкоррупция идораси фаолиятида қўлланиладиган электрон восита ва дастурлар, улардан бошқа идоралар фойдаланиш имкониятлари, бу борада жиноятчиликнинг олдини олиш ҳамда унга қарши курашишда эришилаётган ютуқларга бағишланган тақдимот ташкил этилди.

Коррупцияга қарши курашиш агентлиги

Ахборот хизмати