Коррупцияга қарши курашиш агентлиги директори бошчилигидаги Ўзбекистон делегациясининг Миср Араб Республикасига амалий ташрифи 12 октябрь куни ҳам давом этди.

Аввал хабар қилганимиздек, ташрифнинг дастлабки куни делегация аъзолари Маъмурий назорат идораси билан учрашишди ҳамда ҳамда ташрифнинг асосий воқеаси томонлар ўртасида идоралараро Меморандумнинг имзоланди.

Делегация аъзолари ташрифнинг навбатдаги кунида Миср Коррупцияга қарши курашиш академияси раҳбарияти ҳамда Коррупцияга қарши курашиш мувофиқлаштириш қўмитаси вакиллари билан учрашди.

Учравув доирасида коррупцияга қарши курашиш бўйича сиёсатни ишлаб чиқиш ва амалга ошириш, соҳага оид стратегия ва дастурларни ижросини мониторинг қилиш, Маъмурий назорат идораси ходимлари ҳамда бошқа давлат хизматчиларини коррупцияга қарши курашиш юзасидан ўқитиш тўғрисида маълумотлар олинди.

Шунингдек, коррупцияга қарши курашиш академияси томонидан барча давлат хизматчилари учун махсус аксилкоррупция курслари ишлаб чиқилгани, прокуратура ва суд органлари ходимлари учун чуқурлаштирилган ўқув курслар жорий этилгани маълум қилинди.

Учрашувда томонлар меморандум доирасида қўшма лойиҳа ишлаб чиққан ҳолда Ўзбекистон Республикасининг давлат хизматчилари учун халқаро стандартларга асосланган коррупцияга қарши курашиш бўйича ўқув дастурларини ишлаб чиқиш ҳамда Миср коррупцияга қарши курашиш академияси билан ҳамкорликда Ўзбекистонда коррупцияга қарши курашиш виртуал академиясини ташкил этишда методологик ва ўқув дастурларини ишлаб чиқиш бўйича келишувга эришилди.

Шундан сўнг Коррупцияга қарши курашиш мувофиқлаштириш қўмитаси билан учрашув доирасида Миср аудит идораси, Бош прокуратураси ва Ташқи ишлар вазирлигининг коррупцияга қарши курашишга масъул раҳбарлари билан ўзаро тажриба алмашилди.

Муҳокамалар давомида мазкур идораларнинг коррупцияга қарши курашиш соҳасидаги фаолияти, мувофиқлаштирувчи орган билан ҳамкорлик йўналишлари ҳақида маълумот берилди.

Учрашув сўнггида томонилар ҳамкорликда коррупцияга қарши курашиш соҳасида давлат стратегиясини ишлаб чиқиш ва амалга ошириш ҳамда давлат харидлари соҳасида қўшма тренинг-семинар ташкил этиш, шунингдек биргаликда тадбирлар учун Миср делегациясини Ўзбекистонга амалий ташрифини ташкил этиш юзасидан келишувга эришдилар.

Коррупцияга қарши курашиш агентлиги

Ахборот хизмати