O‘zbekiston Respublikasi Prezidentining 2020-yil 15-sentyabrdagi “Qishloq xo‘jaligini rivojlantirish xalqaro jamg‘armasi ishtirokida “Qishloq xo‘jaligini diversifikatsiya va modernizatsiya qilish” loyihasini amalga oshirishga doir qo‘shimcha chora-tadbirlar to‘g‘risida”gi 4830-sonli Qarori bilan Agrosanoat majmuasi va oziq-ovqat taʼminoti sohasidagi loyihalarni amalga oshirish (keyingi o‘rinlarda AMOTSLA deb yuritiladi) agentligi Loyiha boshqaruvchisi etib belgilangan. Qarorda Korrupsiyaga qarshi kurashish agentligiga Loyiha doirasida ajratilgan mablag‘larning maqsadli ishlatilishi jarayonida ochiqlik va oshkoralikni taʼminlash ustidan nazorat o‘rnatish vazifasi yuklatilgan.

Shunga muvofiq, Agentlik tomonidan loyiha doirasida amalda moliyalashtirilgan mablag‘lar, mahsulot va xizmatlarni yetkazib beruvchilarni tanlab olish yuzasidan o‘tkazilgan tender (tanlov)lar hamda boshqa maʼlumotlar muntazam tahlil qilinib, ularni yanada ochiq va oshkoraligini taʼminlash, ushbu jarayonlarda korrupsiya holatlariga yo‘l qo‘ymaslik borasida zarur chora-tadbirlar amalga oshirilmoqda. Xususan, loyiha doirasida qishloq xo‘jaligini diversifikatsiya va modernizatsiya qilish uchun jami 92,4 mln. AQSH dollari ajratish nazarda tutilgan bo‘lib, hozirda 102 ta subloyihalarni moliyalashtirish maqsadida Respublikadagi 5 ta bank muassasalaridan (Xalq banki, Turon bank, Ipoteka-bank, Qishloq qurilish bank va Savdogarbank) 14,2 mln. AQSH dollari mablag‘ ajratish yuzasidan talabnomalar kelib tushgan va ulardan 98 tasi bo‘yicha 13,1 mln. AQSH dollari qismini moliyalashtirishga ruxsat berilgan.
Shuningdek, bugungi kunga qadar loyiha doirasida belgilangan tadbirlarni amalga oshirish uchun mahsulot va xizmatlarni yetkazib beruvchilarni tanlab olish bo‘yicha umumiy qiymati 1,1 mln. AQSH dollariga teng bo‘lgan tender (tanlov)lar o‘tkazilgan. 

Har bir o‘tkazilgan tender (tanlov)ni ochiq va shaffof bo‘lishini taʼminlash maqsadida buyurtmachi tomonidan ommaviy axborot vositalarida (sayt, gazeta va boshqa) muntazam eʼlon va axborotlar joylashtirib borilmoqda. Shu bilan birga, loyiha doirasida amalga oshirilayotgan tadbirlarni ochiq va oshkoraligini taʼminlash maqsadida AMOTSLA Agentligining “uzaifsa.uz” maxsus sayti tashkil qilingan bo‘lib, unda tadbirkor va fuqarolar uchun amalga oshirilgan tadbirlar muntazam yoritib borilmoqda. Bugungi kun holatiga Loyiha doirasida amalga oshirilgan ishlar haqida keng jamoatchilikka ommaviy axborot vositalari orqali 47 marotaba maʼlumot va materiallar berilgan. 

Joriy yilning iyun oyida Agentlik tomonidan Loyiha doirasida Andijon va Farg‘ona viloyatlarida amalga oshirilgan ishlar joyiga chiqib o‘rganildi. Xususan, Agentlik direktori tomonidan loyiha doirasida Xo‘jaobod tumanida joylashgan “Zamon” MCHJga tadbirkorlik faoliyatini rivojlantirish maqsadida ajratilgan kredit mablag‘lari evaziga yo‘lga qo‘yilgan faoliyat hamda tumandagi yangi barpo etilgan Veterinariya klinikasida amalga oshirilgan qurilish ishlari joyiga borib tanishib chiqildi.

Qishloq xo‘jaligi yo‘nalishida faoliyat olib boruvchi tadbirkorlik subyektlari Xalqaro moliya institutlari ishtirokida amalga oshirilayotgan loyihalar hamda ajratib berilayotgan kredit mablag‘lari haqidagi maʼlumotlarni olishda Xalq banki, “Turonbank” ATB , ATIB “Ipoteka-bank”, ATB “Qishloq qurilish bank” va “Savdogar” ATB larining tuman-shahar hamda viloyat markazlaridagi filiallari, shuningdek, Agrosanoat majmuasi va oziq-ovqat taʼminoti sohasidagi loyihalarni amalga oshirish agentligining hududiy vakillariga murojaat qilishlari mumkin.