O‘zbekiston Respublikasi Prezidentining 2020-yil 25-noyabrdagi “Jahon bankining Xalqaro taraqqiyot uyushmasi va Osiyo infratuzilma investitsiyalari banki ishtirokida “Qishloq infratuzilmasini rivojlantirish” loyihasini amalga oshirish chora-tadbirlari to‘g‘risida”gi PQ-4898-son Qarori bilan Korrupsiyaga qarshi kurashish agentligi zimmasiga “Qishloq infratuzilmasini rivojlantirish” loyihasiga ajratilgan mablag‘larning maqsadli ishlatilishi jarayonida ochiqlik va oshkoralikni taʼminlash ustidan doimiy nazorat o‘rnatish vazifasi yuklatilgan.

Loyihaga Respublikaning Andijon, Farg‘ona, Namangan, Jizzax va Sirdaryo viloyatlaridagi 300 dan ortiq qishloqlar kiritilgan bo‘lib, mazkur aholi punktlarida asosiy ijtimoiy infratuzilma sifatini yaxshilash uchun mablag‘ olish imkoniyati yaratiladi. Mazkur ishlar uchun Jahon banki tomonidan 100 mln AQSH dollari va Osiyo infratuzilma investitsiyalari banki tomonidan 82 mln AQSH dollari miqdorida kredit mablag‘lari jalb etilgan. Shuningdek, O‘zbekiston Respublikasi hukumati tomonidan ayni maqsadda 1,6 mln AQSH dollari ajratilgan bo‘lib, loyihaning jami qiymati 183,6 million AQSH dollarini tashkil etadi.Loyiha qishloq aholisining asosiy infratuzilma sifatini oshirish va qishloq hayotiy faoliyatini taʼminlovchi xizmatlar sifatini yaxshilashga qaratilgan. Shuningdek, loyiha mahalliy o‘zini o‘zi boshqarish tizimini takomillashtirishga, qishloq aholisini o‘z mahalla infratuzilmasida ko‘rsatiladigan xizmatlarga bo‘lgan asosiy ehtiyojlarini taʼminlashga ko‘mak beradi. 

Ajratilgan mablag‘larning maqsadli ishlatilishi hamda ishlarning amalga oshish mexanizmini o‘rganish maqsadida Agentlik direktori rahbarligidagi ishchi guruh Farg‘ona viloyatida Iqtisodiy taraqqiyot va kambag‘allikni qisqartirish vazirligi mutasaddilari, xalqaro tashkilotlar vakillari hamda loyiha ishtirokchilari bilan uchrashdi.

Qayd etilishicha, bugungi kunda ijtimoiy obyektlarni tanlash jarayoni shaffof va ochiq o‘tkazilishini taʼminlash maqsadida loyihaga mahalliy nodavlat notijorat tashkilotlari ham jalb etilgan.
Farg‘ona vodiysi bo‘yicha 2021-yil davomida 32 ta subloyiha obyektlarida ishlar olib borilishi rejalashtirilgan bo‘lib, hozirda konsalting kompaniyalar tajriba tariqasida tanlangan  qishloqlarda safarbarlik ishlarini olib bormoqda. Bundan tashqari, qishloqlarda bazaviy infratuzilma va ijtimoiy soha obektlarini yaxshilash bo‘yicha ishlarni tashkillashtirish maqsadida 2021-2022-yil uchun Jizzax va Sirdaryo viloyatlarida jami 45 ta qishloq tanlab olindi. Shundan, hozirda 36 tasida aholi va jamoa safarbarligi ishlari yakunlandi.

Shuningdek, loyiha doirasida Andijon viloyati Paxtabod tumani “Sohil” MFYda 264 o‘rinli va Jizzax viloyati Bahmal tumani “Saroy” MFYda 220 o‘rinli 2 ta zamonaviy maktab qurilishi belgilangan bo‘lib, hozirda loyiha-smeta hujjatlari ishlab chiqildi hamda davlat ekspertizasidan o‘tkazildi. Bugungi kunda qurilish-taʼmirlash ishlarini olib borish uchun pudrat tashkiloti aniqlanmoqda.Bundan tashqari, tanlangan qishloqlarda jami 67 ta loyihalar, jumladan 21 ta toza ichimlik suvi, 24 ta elektr taʼminoti tizimini yaxshilash, 14 ta ichki ko‘chalarni taʼmirlash, 2 ta maktab binosini rekonstruksiya qilish, 2 ta maktab faollar zali, zamonaviy sport maydonchasi va kompyuter sinfini rekonstruksiya qilish, 1 ta maktab isitish tizimini yaxshilash, 1 ta ko‘prik qurilishi hamda 2 ta zax suvlarni qochirish (drenaj rekonstruksiyasi) kabi infratuzilmaviy obyektlarga talab birlamchi va dolzarb ekanligi aniqlandi.

Bundan tashqari, tanlangan qishloqlarda jami 67 ta loyihalar, jumladan 21 ta toza ichimlik suvi, 24 ta elektr ta’minoti tizimini yaxshilash, 14 ta ichki ko‘chalarni ta’mirlash, 2 ta maktab binosini rekonstruksiya qilish, 2 ta maktab faollar zali, zamonaviy sport maydonchasi va kompyuter sinfini rekonstruksiya qilish, 1 ta maktab isitish tizimini yaxshilash, 1 ta ko‘prik qurilishi hamda 2 ta zax suvlarni qochirish (drenaj rekonstruksiyasi) kabi infratuzilmaviy ob’ektlarga talab birlamchi va dolzarb ekanligi aniqlandi.

Hozirda buyurtmachi – viloyat hokimliklari huzuridagi “Yagona buyurtmachi hizmati” injiniring kompaniyalari tomonidan loyihalovchi tashkilotlar bo‘yicha tanlovlar o‘tkazilmoqda.

2021 yilda loyiha doirasida yuqorida qayd etilgan chora-tadbirlarni amalga oshirish natijasida 20,5 mln. AQSH dollari miqdoridagi mablag‘larni jalb etish ko‘zda tutilmoqda.