Eskirgan ma'lumotlar bazasi va usullar, raqamlashtirish va axborot texnologiyalarini joriy etishning past darajasi geodeziya, kartografiya va kadastr sohasida talon-tarojlik va korrupsiyaning ildiz otishiga turtki bo‘ldi. 

Prezident Shavkat Mirziyoev raisligida joriy yilning 21 iyul' kuni yer hisobi va davlat kadastrlarini to‘liq shakllantirish, sohaga raqamli texnologiyalarni joriy etish masalalari bo‘yicha o‘tkazilgan yig‘ilish davomida 66 ta tumanda 150 ming gektar ekin yeri o‘zboshimchalik bilan egallangani, oxirgi ikki yilda 122 nafar kadastr xodimi jinoiy javobgar bo‘lgani ta'kidlandi. 

Yerning hosildorligi sun'iy yo‘ldosh tasvirlari orqali tahlil qilinadi 

Yig‘ilishda qator dolzarb masalalar muhokama qilindi, muhim vazifalar belgilab olindi. Xususan, yil yakuniga qadar yer turi, konturi, chegarasi va foydalanuvchisi haqidagi ma'lumotlar jamlangan axborot tizimini ishga tushirish vazifasi qo‘yildi. Endi yer ajratish to‘g‘risidagi qaror mazkur tizimga kiritilsagina haqiqiy hisoblanadi.

Qishloq xo‘jaligi vazirligiga yil yakunigacha 10 ming gektar yer maydonining tuproq tahlilini va agrotexnologik xaritalarini tayyorlash vazifasi qo‘yildi. Shuningdek, kosmosuratlarni yillar bo‘yicha taqqoslash orqali hosildorlikni tahlil qilish uchun yerlarning meliorativ holatini muntazam o‘rganishda sun'iy yo‘ldosh kanallarini ijaraga olish va signallarni qayta ishlash tizimini tashkil etishga ko‘rsatma berildi. 

Barcha kadastrlar yagona bazada

Sohadagi yana bir kamchilik – ba'zi turdagi kadastrlar to‘liq shakllanmagan. Masalan, avtomobil' yo‘llari kadastri 23 foiz, madaniy meros ob'ektlari 32 foiz, quvurlar 32 foiz, shaharsozlik kadastri 63 foiz shakllangan, xolos. Shu bois kadastrlar bazasini to‘liq ishlab chiqish topshirildi.

Qishloq xo‘jaligini boshqarishni raqamlashtirish, kelgusi yildan yer balansi va uning hisobini Milliy geoaxborot tizimida yuritish zarurligi qayd etildi. Yil yakuniga qadar qishloq xo‘jaligi maydonlarini elektron tanlov va auksion asosida ajratish tartibini joriy qilish, xalqaro ekspertlarni jalb etgan holda yer toifalarini optimallashtirish bo‘yicha topshiriq berildi.

Har to‘rtinchi xodimning mutaxassisligi qo‘mita yo‘nalishiga to‘g‘ri kelmaydi

“Ergeodezkadastr” davlat qo‘mitasining tuproq sifatini baholash, yerlarni rivojlantirish, ekinlarni joylashtirish bilan bog‘liq vazifalarini, shuningdek, Tuproqshunoslik va agrokimyo ilmiy-tadqiqot institutini Qishloq xo‘jaligi vazirligiga o‘tkazish taklifi bildirildi. Jahon bankidan ajratilayotgan 87 million dollar hisobidan mazkur institut faoliyatini rivojlantirish, laboratoriyalarini yangilash muhimligi qayd etildi. 

Prezident Shavkat Mirziyoev sohaning kadrlar salohiyati pastligi, “Ergeodezkadastr” davlat qo‘mitasi tizimidagi 27 foiz xodimlar mutaxassisligi sohaga to‘g‘ri kelmasligini qayd etdi. Shu munosabat bilan xorijiy oliy o‘quv yurti filialini tashkil qilish muhimligi, Italiyaning Piza universiteti hamda Moskva davlat geodeziya va kartografiya universiteti bilan hamkorlik o‘rnatish kerakligi ta'kidlandi.