Korrupsiyaga qarshi kurashish agentligi tomonidan davlat tashkiloti va mahalliy hokimiyat vakillari uchun davlat xizmatida halollikni ta’minlashga oid xorijiy davlatlar tajribasini o‘rganish bo‘yicha turkum seminarlar o‘tkazish rejalashtirilgan.

Joriy yilning 16-mart kuni “Davlat xizmatida halollikni ta’minlash: Buyuk Britaniya tajribasi” mavzusida seminarlarning dastlabkisi bo‘lib o‘tdi.

Ushbu seminar Buyuk Britaniyaning Hukumatlararo hamkorlik xizmati bilan hamkorlikda tashkil etildi. Unda 80 dan ortiq davlat tashkiloti va mahalliy hokimliklar tuzilmasidagi korrupsiyaga qarshi kurashish masalalariga mas’ul bo‘lgan xodimlar ishtirok etdi.

Ma’lumot uchun: Hukumatlararo hamkorlik xizmati (HHX) Tashqi ishlar, hamdo‘stlik va taraqqiyot idorasining bir qismi bo‘lib, u sheriklik aloqalari o‘rnatilgan chet davlatlar hukumatlariga, ular o‘z fuqarolariga yaxshiroq xizmatlar ko‘rsatishida Buyuk Britaniya davlat xizmatlari tajribasiga tayanib maslahatlar berish orqali mamlakatlarning davlat xizmatlarini taqdim etishdagi salohiyatlarini oshirishga yordam beradi.

Tadbirni kirish so‘zi bilan Buyuk Britaniya va Shimoliy Irlandiya birlashgan qirolligining Favqulodda va muxtor elchisi Tim Torlot ochib berdi.

- Biz Buyuk Britaniya hukumati tomonidan Korrupsiyaga qarshi kurashish agentligining mamlakatda ushbu illatga qarshi kurashishdagi barcha sayi-harakatlarini qo‘llab quvvatlaymiz. Agentlik tomonidan amalga oshirilayotgan ishlar muhimligini e’tirof etamiz hamda hamkorlikka tayyormiz. Ayniqsa, davlat xizmatchilarida halollik ko‘nikmalarini shakllantirish bo‘yicha o‘quv-seminarlar tashkil etish borasidagi tashabbusini qo‘llab-quvvatlaymiz.

Davlat xizmatchilari davlat va xalq orasidagi asosiy bog‘lovchi rishta hisoblanadi. Shu boisdan ushbu masalaga jiddiy e’tibor qaratishimiz lozim.

Buyuk Britaniya davlat xizmatidagi halollik, muayyan me’yorlarga amal qilish standartlarni sizlar bilan o‘rtoqlashishga tayyormiz.

Seminarda ta’kidlanganidek, O‘zbekiston Respublikasi Prezidentining 2020-yil 29-iyundagi “O‘zbekiston Respublikasida korrupsiyaga qarshi kurashish tizimini takomillashtirish bo‘yicha qo‘shimcha chora-tadbirlar to‘g‘risida”gi Farmoniga muvofiq Korrupsiyaga qarshi kurashish agentligiga davlat xizmatiga halollik standarti (“halollik vaksinasi”) va manfaatlar to‘qnashuvini hal etish standartlarini joriy etishda ko‘maklashish bo‘yicha ta’sirchan choralarni ko‘rish, shuningdek, ularga rioya etilishi ustidan nazoratni amalga oshirish vazifasi yuklatilgan.

Shu maqsadda vazirlik va idoralar, xalqaro tashkilotlar hamda ekspertlar ishtirokida sohaga oid qonunchilik bazasini takomillashtirish, tashkiliy masalalarni amalga oshirish bo‘yicha chora-tadbirlarni ishlab chiqish va albatta ushbu yo‘nalishda xodimlar malakasini oshirishga qaratilgan qator amaliy ishlar olib borilmoqda.

Tadbirda xalqaro ma’ruzachi doktor Leyla Brosnan tomonidan Buyuk Britaniyaning sohaga oid qonunchiligi, amaliyoti, davlat xizmatida axloqiy xulq-atvorni qo‘llab-quvvatlash masalalariga to‘xtalib o‘tdi. Jumladan, “Konstitutsiyaviy islohot va boshqaruv to‘g‘risida”gi, “Poraxo‘rlik to‘g‘risida”gi, “Axborot erkinligi to‘g‘risida”gi qonunlar, “Davlat xizmati to‘g‘risida”gi kodeks, “Sovg‘alar va xarajatlar to‘g‘risida”gi qoidalar, sobiq davlat xizmatchilari xususiy sektorga ishga o‘tishi yuzasidan Buyuk Britaniyaning amaliyoti, Buyuk Britaniya Parlamentiga a’zolar tayinlash tajribasi qamrab olindi.

Ta’kidlanganidek, Buyuk Britaniyada davlat xizmatchilari amal qilishi lozim bo‘lgan xulq-atvor standartlari “Davlat xizmati to‘g‘risidagi kodeks” bilan tartibga solinadi. Kodeks qoidalariga amal qilinishida Davlat xizmatlari bo‘yicha mustaqil komissiya tashkiloti alohida o‘ringa ega.

Shuningdek, Buyuk Britaniyaning davlat xizmatlari bilan bog‘liq sovg‘alarni qabul qilish va davlat xizmatida daromadalar va xarajatlar to‘g‘risida ma’lumotlar taqdim etishni tartibga soluvchi qoidalar ham kiritilgan.

Bundan tashqari Buyuk Britaniyada sobiq vazirlar, yuqori lavozimli va boshqa davlat xizmatchilari uchun yangi ish joylari to‘g‘risida, ayniqsa, biznesga, xususiy sektorga o‘tish tartibi aniq qoidalar bilan belgilangan hamda Xususiy sektorga o‘tish bo‘yicha maslahat qo‘mitasi ushbu jarayonga mas’ul hisoblanadi. 

Seminarda Korrupsiyaga qarshi kurashish agentligi tomonidan ham mazkur sohalarni tartibga soluvchi qonunchilik asoslari yaratish bo‘yicha tegishli choralar ko‘rilayotgani qayd etildi. Jumladan, “Davlat xizmatchilarining daromadlari, mol-mulkini deklaratsiya qilish va manfaatlar to‘qnashuvi to‘g‘risida”gi qonuni loyihasi ishlab chiqildi, “Davlat fuqarolik xizmati to‘g‘risida”gi qonun loyihasiga manfaatlar to‘qnashuvi hamda sovg‘a masalalari bo‘yicha tegishli takliflar kiritildi. Shu bilan birga Korrupsiyaga qarshi kurashish milliy kengashi tomonidan tasdiqlangan Korrupsiyaga qarshi kurashish xalqaro standartlarini O‘zbekiston Respublikasi qonunchiligiga implementatsiya qilishni davom ettirish bo‘yicha “Yo‘l xaritasi”da ham sobiq davlat idorasi mansabdor shaxslarining faoliyati davomida boshqaruv va nazorat sohasida ma’lum bir faoliyat yuritmaslik talabini, xodimlarning kasbga oid fazilatlari va alohida xizmatlari (meritokratiya tamoyili) asosida xizmat pog‘onalarida ko‘tarilishning shaffof mexanizmlarini joriy etish to‘g‘risidagi normalarni aks ettirish belgilangan.

Tadbir yakunida sohaga ushbu yo‘nalishni takomillashtirishda hamkorlik aloqalarini yanada yaxshilash, bu sohadagi huquqiy asoslarni rivojlantirish hamda davlat xizmatida halollik standartini joriy etishga qaratilgan seminarlarni muntazam tashkil etishga kelishib olindi.