Joriy yilning 26-mart kuni Korrupsiyaga qarshi kurashish agentligi BMT Taraqqiyot Dasturining O‘zbekistondagi vakolatxonasi bilan hamkorlikda O‘zbekiston Respublikasining Korrupsiyaga qarshi kurashish bo‘yicha 2021-2025-yillarga mo‘ljallangan Milliy strategiyasi loyihasi muhokamasiga bag‘ishlab, navbatdagi Milliy maslahat yig‘ilishi tashkil etildi.

Mazkur tadbirda Fanlar akademiyasi, Davlat boshqaruv akademiyasi, O‘zbekiston Respublikasi Prezidenti Administratsiyasi huzuridagi iqtisodiy tadqiqotlar va islohotlar markazi, Sudyalar oliy maktabi, Qonunchilik muammolari va parlament tadqiqotlari instituti, Ichki ishlar Akademiyasi, Toshkent davlat yuridik universiteti va boshqa yetakchi ilmiy-tadqiqot institutlari vakillari ishtirok etishdi.

Qayd etilganidek, “2021-2025-yillarga mo‘ljallangan O‘zbekiston Respublikasining korrupsiyaga qarshi kurashish milliy strategiyasi” loyihasi “Yoshlarni qo‘llab-quvvatlash va aholi salomatligini mustahkamlash yili”da amalga oshirishga oid davlat dasturi doirasida ishlab chiqilgan bo‘lib, uni maromiga yetkazish, hayotiyligini ta’minlash maqsadida davlat tashkilotlari, fuqarolik jamiyati institutlari, akademik doira vakillari hamda xalqaro ekspertlar ishtirokida Milliy va xalqaro maslahatlashuvlar tashkil etish rejalashtirilgan.

Ta’kidlash joizki, mazkur Strategiyaning dastlabki loyihasi joriy yilning 28-yanvar kuni Oliy Majlis palatalari, Sudyalar oliy kengashi, Bosh prokuratura, vazirlik va boshqa davlat tashkilotlari vakillari bilan, 18-mart kuni esa fuqarolik jamiyati institutlari ishtirokida muhokamadan o‘tkazilgan edi. Muhokamalarda korrupsiyaga qarshi kurashish sohasida huquqiy bo‘shliqlarni bartaraf etish, davlat xizmati tizimining normativ asoslarini takomillashtirish, sud hokimiyatining mustaqilligini yanada mustahkamlash, davlat xizmatchilarining daromadlarini deklaratsiya qilish tizimini joriy etish, davlat xaridlari amalga oshirishning samarali huquqiy mexanizmlarini yaratish, fuqarolik jamiyati institutlari, OAV faoliyatining chinakam erkinligini ta’minlash bo‘yicha 100 dan ortiq takliflar bildirilgan edi. Shu asnoda har bir ishtirokchi tomonidan bildirilgan takliflar asosida strategiya loyihasi yanada takomillashtirildi.

Milliy maslahatlashuv yig‘ilishining navbatdagisi esa, Strategiya loyihasi yuzasidan ilmiy va akademik doira vakillarining fikrini olish, masalaga ilmiy asosda yondashgan holda o‘zaro muhokama qilib olish va unga takliflar olish maqsadida tashkil etildi. Yig‘ilishda Strategiya loyihasining turli doira vakillari ishtirokida muhokama qilish muhimligi, zero korrupsiyani bartaraf etish uchun birgina davlat organlarini safarbar qilish orqali natijaga erishib bo‘lmasligi, korrupsiya illatini yo‘qotish uchun hamma birlashib, muvofiqlashgan holda kurashni tashkil etish lozimligi ta’kidlandi.

Qayd etilganidek, korrupsiyaga qarshi kurash va uni oldini olishda sohaning qonunchilik asoslarini takomillashtirish, jazo muqarrarligini ta’minlash bilan birga masalaga ilmiy yondashuv alohida ahamiyatga ega. Shuning uchun akademik doira, ilm vakillarining har bir fikri muhimligi e’tirof etildi.

Yig‘ilishda qayd etilganidek, Korrupsiyaga qarshi kurashish agentligi tomonidan ishlab chiqilayotgan strategiya loyihasida ham uzoq va yaqin muddatlarga mo‘ljallangan bir qator strategik masalalardan iborat.

Strategiya loyihasida joriy holat tahlili, ijobiy tendensiyalar, muammolar, korrupsiyani keltirib chiqarayotgan asosiy omillar, maqsad va uning indikatorlari o‘rin olgan.

Xususan, unda davlat xizmatida, shuningdek xususiy sektor hamda nodavlat notijorat tashkilotlarida korrupsiyaga qarshi kurashish, samarali jamoatchilik nazoratini o‘rnatish, sud va huquqni muhofaza qiluvchi organlarda korrupsiyaning oldini olish, ushbu sohada xalqaro hamkorlikni rivojlantirish kabi masalalar o‘z aksini topgan.

Qizg‘in bahs-munozaralar va takliflarga boy o‘tgan yig‘ilishda har bir ishtirokchi o‘z yo‘nalishidan kelib chiqqan holda mulohazalarini bildirdi. Jumladan, ushbu yo‘nalishdagi ilmiy tadqiqotlar amalga oshirish, korrupsiyaga qarshi kurashishda aholining dunyoqarashini e’tiborga olish, jamiyatdagi korrupsion sabablarni to‘liq ilmiy tadqiq etish, bo‘yicha tegishli takliflar ilgari surildi. Bundan tashqari ushbu illatga qarshi kurashishda iqtisodiy masalalarga e’tibor qaratish, fuqarolarning korrupsiyaga murosasizlik kayfiyati shakllanish jarayonlariga psixologik va sotsiologik yondashish zarurligi bo‘yicha ham fikrlar o‘rtaga tashlandi.

Bildirilgan takliflar asosida Milliy strategiya loyihasi yuzasidan takomillashtirish hamda kelgusida xorijiy ekspertlar ishtirokida Xalqaro maslahat yig‘ilishini o‘tkazish rejalashtirilgan.