Joriy yilning 31-mart kuni Korrupsiyaga qarshi kurashish agentligi binosida 2021-yilda Agentlik hamda Birlashgan Millatlar Tashkilotining Giyohvand moddalar va jinoyatchilik bo‘yicha boshqarmasining (BMT GJB) mintaqaviy vakolatxonasi hamkorlikda amalga oshiradigan tadbirlar Rejasini imzolash marosimi bo‘lib o‘tdi

Ma’lumot uchun: BMT GJB giyohvandlik va xalqaro jinoyatchilikka qarshi kurashda yetakchi global tashkilot hisoblanadi.

Ushbu idora 1997-yilda Birlashgan Millatlar Tashkilotining Giyohvand moddalarni nazorat qilish dasturi va Xalqaro jinoyatchilikning oldini olish markazini birlashtirish orqali tashkil etilgan.

BMT GJB butun dunyo bo‘ylab mintaqaviy vakolatxonalar tarmog‘i orqali ishlaydi.

Uchrashuvda Agentlik direktori Akmal Burxanov, BMT GJB mintaqaviy vakolatxonasi vakili Ashita Mittal va har ikki tashkilot mas’ul xodimlari ishtirok etdi.

Tomonlar ish reja doirasida belgilangan vazifalar va hamkorlik yo‘nalishlarini muhokama qilishdi. Ta’kidlanganidek, ish reja quyidagi asosiy yo‘nalishlardan tashkil topgan:

• O‘zbekiston Respublikasida korrupsiyani oldini olish yo‘nalishidagi amaliyot va milliy qonunchilikni takomillashtirish; 
• Korrupsiyaning oldini olish va unga qarshi kurashish sohasida jamoatchilik vakillarining salohiyatini oshirish;
• O‘zbekiston Respublikasining BMTning Korrupsiyaga qarshi kurashish konvensiyasida ishtiroki doirasidagi majburiyatlarining bajarilishini ta’minlashga ko‘maklashish;
• Jamiyatda korrupsiyaga qarshi murosasizlik madaniyatini shakllantirish.

Qayd etilganidek, ushbu yo‘nalishlar doirasida davlat budjeti va davlat mablag‘lari hisobidan moliyalashtiriladigan investitsion loyihalarning korrupsiyaga qarshi ekspertizadan majburiy o‘tkazish tartib-taomillarini ishlab chiqish, Korrupsiyani qabul qilishning milliy indeksini ishlab chiqish kabi vazifalar belgilangan

Shu bilan birga mamlakatda korrupsiya holati, jumladan, tadbirkorlik faoliyatida korrupsiya xavfi bo‘yicha tadqiqotlar olib borish, Agentlik xodimlari hamda Agentlik huzuridagi Jamoatchilik kengashining salohiyatini mustahkamlash kabi masalalar ham o‘rin olgan.

Agentlik direktori yangi O‘zbekistonning korrupsiyaga qarshi kurashish siyosatida xalqaro hamkorlik ustuvor yo‘nalishlardan biri ekanligi, hozirgi kunga qadar bu borada BMT tuzilmalari xususan, Giyohvand moddalar va jinoyatchilik bo‘yicha boshqarmasi doimo agentlik tashabbuslarini qo‘llab-quvvatlayotgani uchun o‘z minnatdorchiligini bildirdi. Ish rejadagi vazifalarning aniq belgilanishi ularning hayotga samarali tatbiq etilishiga turtki bo‘lishini ta’kidladi.

O‘z navbatida Ashita Mittal xonim hamkorlik aloqalari yanada rivojlanayotganidan mamnunligini bildirdi. Boshqarma mamlakatimizda Prezident Shavkat Mirziyoyev boshchiligida so‘nggi yillarda olib borilayotgan o‘zgarishlarni qo‘llab-quvvatlashga tayyor ekanligini qayd etdi.

Uchrashuv yakunida tomonlar imzolangan Korrupsiyaga qarshi kurashish agentligi hamda Birlashgan Millatlar Tashkilotining Giyohvand moddalar va jinoyatchilik bo‘yicha boshqarmasining mintaqaviy vakolatxonasi hamkorlikda amalga oshiradigan tadbirlar Rejasidagi vazifalarni amaliyotga tatbiq etish har ikki tomon uchun ham samarali bo‘lishi uchun tegishli vazifalarni amalga oshirishlarini bildirishdi.