Korrupsiyaga qarshi kurashish agentligi tomonidan Bosh prokurutara, Oliy va o‘rta-maxsus ta’lim vazirligi hamda Agentlik huzuridagi Jamoatchilik kengashi vakillari ko‘magida respublika oliy ta’lim muassasalari professor-o‘qituvchilari va talabalari bilan uchrashuvlar tashkil etgan holda, ularning korrupsiyaga qarshi kurashish bo‘yicha bilimlarini oshirish va bu boradagi davlat siyosatini, olib borilgan islohotlar mazmunini tushuntirish bo‘yicha joriy yilning may-iyun oylarida turkum seminarlarni tashkil etish rejalashtirilgan.
Joriy yilning 25-may kuni mazkur seminarlarning birinchisi tashkil etilib, unda Toshkent davlat yuridik universiteti, O‘zbekiston davlat jahon tillari universiteti, Toshkent davlat sharqshunoslik universiteti, Toshkent davlat pedagogika universiteti, O‘zbekiston milliy universiteti, O‘zbekiston xalqaro islom akademiyasi hamda Jahon iqtisodiyoti va diplomatiya universiteti professor-o‘qituvchilari va talabalari ishtirok etdi.
 

Seminarda Vebster Universiteti professori, Xalqaro korrupsiyaga qarshi kurashish akademiyasining O‘zbekistondagi vakili, Agentlik huzuridagi Jamoatchilik kengashi a’zosi Qodir Kuliyev qatnashib, seminar ishtirokchilariga korrupsiya tushunchasi va mohiyati, korrupsiyaning umumiy, shu jumladan O‘zbekistonda kelib chiqish sabablari, korrupsiyaga qarshi kurashishning ahamiyati va Oliy ta’lim tizimida korrupsiyaning zararli oqibatlari to‘g‘risida ma’lumot berib o‘tdi.

Shundan so‘ng Toshkent shahar prokuraturasi Ijtimoiy qonunchilik ijrosi ustidan nazorat bo‘limi katta prokurori Jahongir Kamilovning Oliy ta’lim tizimidagi korrupsiyaga qarshi kurashish borasida amalga oshirilgan chora-tadbirlar hamda bugungi kunda amaliyotda mavjud bo‘lgan muammolar haqida ma’ruza qildi.
Seminar yakunida ishtirokchi talaba yoshlarning savollariga javob berilib, taklif va fikr-mulohazalari tinglandi.
Tadbirlar respublika oliy ta’lim muassasalarida 3 iyun kuniga qadar bo‘lib o‘tadi.