Korrupsiyaga qarshi kurashish agentligi tomonidan davlat xaridlari sohasida ochiqlik va shaffoflik tamoyillarini to‘liq joriy qilish orqali korrupsiyaviy xavf-xatarlarning oldini olish hamda korrupsiyani keltirib chiqaruvchi sabab va shart - sharoitlarni bartaraf qilishga qaratilgan qator choralar amalga oshirib kelinmoqda. 

Agentlik tomonidan Samarqand viloyatida byudjet buyurtmachilari tomonidan “dxarid.uz” va “tender.mc.uz” maxsus axborot portalida joylashtirilgan eʼlonlar joyiga chiqib o‘rganildi.

O‘rganish natijalariga ko‘ra, buyurtmachilar tomonidan davlat xaridlarini amalga oshirishda 18 ta holatda jami qiymati 50 mlrd. so‘mlik qonunbuzilishlar aniqlandi.

Shundan, Samarqand viloyat hokimligi Injiniring kompaniyasi buyurtmachiligida Xalq taʼlimi vazirligi va Soliq qo‘mitasining quyi tizimlariga qarashli obyektlarda qurilish va taʼmirlash ishlarini amalga oshirish bo‘yicha “tender.mc.uz” maxsus axborot portalida umumiy qiymati 42 mlrd. so‘mlik jami 9 ta tender eʼlonlari joyiga chiqib ko‘zdan kechirilganda, tender g‘oliblari belgilanmasdan turib, qurilish ishlari boshlab yuborilganligi maʼlum bo‘ldi.

Xususan, Samarqand viloyati hokimligi injiniring kompaniyasi tomonidan 2021 yil 3 avgust kuni Kattaqo‘rg‘on shahar Davlat soliq inspeksiyasi binosi qurilishi bo‘yicha qiymati 5,5 mlrd. so‘mlik eʼlon berilgan. Biroq, qurilish ishlari eʼlonda ko‘rsatilgan muddatdan 3 oy oldin, yaʼni may oyida boshlangan.
 

 Samarqand viloyat Ko‘p tarmoqli tibbiyot markazi tomonidan mebel va tibbiyot uskunalarini xarid qilish bo‘yicha jami qiymati 5,5 mlrd. so‘mlik 5 ta tanlov eʼlonlari va o‘tkazilgan tanlov hujjatlari o‘rganilganda, qonunbuzilish holatlari aniqlandi.
 

Xususan, Samarqand viloyat Ko‘p tarmoqli tibbiyot markazi tomonidan 4 ta lot bo‘yicha tibbiyot uskunalarini xarid qilish uchun eʼlon berilgan. Mazkur o‘tkazilgan tanlovlar hujjatlari o‘rganilganda, unda g‘olib bo‘lgan jamiyatlar, yaʼni «Sam Med Torg», «Samarkand Eko Med», «Gamma Med», «Samarqand Ideal Pharm» MCHJlarning taʼsischilari o‘zaro qarindoshligi  maʼlum bo‘ldi.

Samarqand iqtisodiyot va servis instituti tomonidan mebellar to‘plamini xarid qilish va taʼmirlash ishlarini amalga oshirish maqsadida jami qiymati 2 mlrd. 200 mln so‘mlik 3 ta tanlov eʼlon qilingan bo‘lib, o‘rganish natijasida ushbu holatlar bo‘yicha ham qonunbuzilishlar qayd etildi.

Unda Vazirlar Mahkamasining 2021 yil 5 fevraldagi 55-son qarori talablariga zid ravishda mazkur institut tomonidan bir turdagi xarajatlarga tegishli bo‘lgan taʼmirlash ishlari, yaʼni Iqtisodiyot fakultetining ikkinchi qavatini mukammal taʼmirlash bo‘yicha umumiy xarid hajmi ikki qismga bo‘linib, tanlov eʼlon qilingan.

Jomboy tumani hokimligi tomonidan hokimlikning maʼmuriy binosini qurish bo‘yicha qiymati 400 mln so‘mlik tanlov eʼloni o‘rganilganda, tanlov g‘oliblari aniqlanmasdan turib, qurilish ishlari yakunlanganligi maʼlum bo‘ldi. 
 

Yuqorida ko‘rsatilgan holatlarda O‘zbekiston Respublikasining “Davlat xaridlari to‘g‘risida”gi Qonuni va boshqa qonunchilik hujjatlari talablari buzilganligi qayd etildi. Shunga ko‘ra, Agentlik tomonidan vazirlik va idoralarga davlat xaridlari bilan bog‘liq bo‘lgan mazkur lotlarni bekor qilish bo‘yicha taqdimnomalar kiritilib, to‘plangan hujjatlar huquqiy baho berish uchun Bosh prokuraturaga yuborildi.