Korrupsiyaga qarshi kurashishda ochiqlik va shaffoflik, hisobdorlik va halollik mexanizmlarini takomillashtirish va rivojlantirishda ishtirok etish, shuningdek davlat organlari va tadbirkorlar faoliyatining shaffofligi, hisobdorligi, halolligi va haqqoniyligini taʼminlashda jamoatchilik nazoratini joriy etish maqsadida  “O‘zbekistonda ochiqlik va shaffoflik” tahlil markazi tashkil etildi.

 Korrupsiyaga qarshi kurashish va uning oldini olish masalalarida tahlil va tadqiqotlar olib boradigan ushbu nodavlat notijorat tashkilot o‘z faoliyatini oshkoralik, kollegiallik, o‘zaro hurmat, teng huquqlilik, ixtiyoriylik tamoyillari asosida olib boradi.

Markazning asosiy vazifalari etib, quyidagilar belgilandi:

– korrupsiyaning sabablarini va oqibatlarini hamda u yetkazayotgan zararni aniqlash;

– korrupsiyaviy harakatlar oqibatlarini aniqlash, kamaytirish va oldini olish bo‘yicha tadqiqotlar o‘tkazish;

– ochiqlik va shaffoflik, korrupsiyaning oldini olish, qonun ustuvorligini taʼminlash bo‘yicha xalqaro standartlar, amaliyot va muammolarni o‘rganish hamda ularni O‘zbekiston sharoitida qo‘llash bo‘yicha takliflar ishlab chiqish;

– davlat va jamiyatda korrupsiyaga qarshi kurash, huquq ustivorligi, ochiqlik va shaffoflikni taʼminlash sohasida ilmiy faoliyat olib borish, dissertatsiyalar, monografiyalar, darsliklar va boshqa ilmiy-uslubiy ishlar tayyorlash;

– ochiqlik va shaffoflik, korrupsiyaning oldini olish va qonun ustuvorligini taʼminlash masalalari bo‘yicha xalqaro, mintaqaviy, xorijiy va mahalliy dasturlarda, loyihalarda, grantlarda va boshqa tadbirlarda ishtirok etish.

Shuningdek, mazkur tuzilma korrupsiya darajasi, uning qabul qilish holati va shaxsiy hayotida duch kelish darajasini, davlat hokimiyati institutlariga ishonch darajasi va korrupsiyaga qarshi choralar taʼsirini baholash maqsadida jamoatchilik fikrini o‘rganadi.

Taʼkidlash joiz, “O‘zbekistonda ochiqlik va shaffoflik” tahlil markazi Transparency International xalqaro nohukumat tashkilotida akkreditatsiyadan o‘tish va boshqa ixtisoslashgan xalqaro tashkilotlarga aʼzo bo‘lishni, ular bilan hamkorlik qilish va boshqa qator vazifalarni bajarishni o‘z oldiga maqsad qilib qo‘ygan.  

O‘zbekiston Respublikasi Korrupsiyaga qarshi kurashish agentligi Markaz faoliyatini qo‘llab-quvvatlaydi va hamkorlik qilishga tayyor ekanligini bildiradi.