Joriy yilning 29 sentabr kuni Xorazm viloyati Korrupsiyaga qarshi kurashish hududiy kengashining ta’sis yig‘ilishi bo‘lib o‘tdi.

Yig‘ilish avvalida jamiyatda korrupsiya keltirib chiqarayotgan ijtimoiy-moliyaviy muammolar va ularning oldini olish, bartaraf etish maqsadida ishlab chiqilayotgan privintiv mexanizmlar haqida to‘xtalib o‘tildi.

Shundan so‘ng Xorazm viloyati Korrupsiyaga qarshi kurashish hududiy kengashining  a’zolari yig‘ilganlarga tanishtirilib, viloyatda bu borada amalga oshirilishi lozim bo‘lgan ishlar va Kengash a’zolari oldida turgan vazifalar belgilab berildi.  Xususan,

• hududiy Kengash viloyatda korrupsiyaga qarshi kurashish sohasidagi davlat va boshqa dasturlarning amalga oshirilishini tashkil etadi;
• aholining huquqiy ongi va huquqiy madaniyatini yuksaltirishga, jamiyatda korrupsiyaga nisbatan murosasiz munosabatni shakllantirishga doir chora-tadbirlarning ishlab chiqilishi hamda amalga oshirilishini tashkil etadi;
• korrupsiyaga oid huquqbuzarliklarning oldini olish, ularni aniqlash, chek qo‘yish, oqibatlari hamda imkon beruvchi sabablar va shart-sharoitlarni bartaraf etishga doir chora-tadbirlar samaradorligi oshirilishini ta’minlaydi;
• korrupsiyaning holati va tendensiyalari to‘g‘risidagi axborotni yig‘adi hamda tahlil qiladi;
• korrupsiyaga qarshi kurashish bo‘yicha chora-tadbirlarning amalga oshirilishi yuzasidan monitoringni amalga oshirish, ushbu sohadagi mavjud tashkiliy-amaliy va huquqiy mexanizmlarning samaradorligini baholash uchun tegishli hududda qilingan ishlar ijrosi haqida Milliy kengash ishchi organiga axborot taqdim etadi.

Anjuman davomida Korrupsiyaga qarshi kurashish agentligi direktorining o‘rinbosari T.Haydarov, O‘zbekiston Respublikasi Sudyalar oliy kengashi raisi X.Yodgorov, O‘zbekiston Respublikasi Bosh prokuraturasi huzuridagi Iqtisodiy jinoyatlarga qarshi kurashish departamenti boshlig‘i D.Rahimov so‘zga chiqib,  korrupsiyaga qarshi kurashish yo‘nalishida amalga oshirilayotgan islohotlar va bu jarayonda tashkil etilayotgan hududiy Kengashlarning o‘rni haqida batafsil ma’lumot berdilar.