Joriy yilning 17 sentabr kuni O‘zbekiston Respublikasi korrupsiyaga qarshi kurashish milliy Kengashining navbatdagi yig‘ilishida Qoraqalpog‘iston Respublikasi, viloyatlar va Toshkent shahar korrupsiyaga qarshi kurashish hududiy kengashlarini tashkil etish va a’zolarning ro‘yxatini tasdiqlash hamda ularning birinchi birinchi majlislarini tashkil etish masalalari yuzasidan tegishli qaror qabul qilingan edi.

Kuni kecha mazkur qaror ijrosini ta’minlash maqsadida Jizzax viloyati Korrupsiyaga qarshi kurashish hududiy Kengashining ta’sis yig‘ilishi o‘tkazildi.

Yig‘ilishda O‘zbekiston Respublikasi Korrupsiyaga qarshi kurashish agentligi direktori o‘rinbosari Umida Tuxtasheva, Oliy Majlis Qonunchilik palatasi qo‘mita raisi Djahongir Shirinov, O‘zbekiston Milliy axborot agentligi bosh direktorining birinchi o‘rinbosari Sobir Shukurov, viloyat Korrupsiyaga qarshi kurashish hududiy kengashi a’zolari, mahalliy davlat hokimiyati idoralari rahbarlari, nodavlat notijorat tashkilotlari hamda ommaviy axborot vositalari vakillari ishtirok etishdi.

Tadbir davomida yangi tashkil etilgan Korrupsiyaga qarshi kurashish hududiy kengashining asosiy faoliyat yo‘nalishlari hamda vazifalari belgilab olindi.

Jumladan, Korrupsiyaga qarshi kurashish yo‘nalishida amalga oshirilayotgan chora-tadbirlar va ularning ijrosida hududiy kengashlarning o‘rni, hududiy kengash a’zolarining amaldagi qonunchilikdagi bo‘shliqlarni aniqlash va ularni bartaraf etish bo‘yicha takliflar taqdim etish mexanizmlari, fuqarolik jamiyati institutlari va ommaviy axborot vositalari bilan o‘zaro hamkorlik masalalari borasida fikr almashildi.