Ma’lumki, O‘zbekiston Respublikasi Prezidentining 2020 yil 29 iyundagi PF-6013-son Farmonida Agentlikka fuqarolik jamiyati institutlari bilan birgalikda hududlar, iqtisodiyot tarmoqlari va boshqa sohalar kesimida korrupsiyaning darajasini baholovchi Korrupsiyani qabul qilish milliy indeksini tuzish vazifasi yuklatilgan.

Ma’lumot uchun: Mazkur topshiriq ijrosini ta’minlash maqsadida Agentlik uchun Birlashgan Millatlar Tashkilotining Giyohvand moddalar va jinoyatchilik bo‘yicha boshqarmasining Markaziy Osiyodagi mintaqaviy vakolatxonasi (BMT GJB) tomonidan mustaqil xalqaro ekspert O. Shiyan jalb etildi.

Joriy yilning 15 oktabr kuni xalqaro ekspert tomonidan ishlab chiqilgan Korrupsiyani qabul qilish milliy indeksini tuzish metodologiyasini muhokama qilish uchun onlayn uchrashuv tashkil etildi.

Uchrashuv davomida xorijiy ekspert chet el davlatlar tajribasi misolida O‘zbekiston uchun Korrupsiyani qabul qilish milliy indeksini tuzishni tashkil etish bo‘yicha o‘z taklif va tavsiyalarini berib o‘tdi.

Shuningdek, uchrashuvda Korrupsiyani his qilish milliy indeksini aniqlash uchun o‘tkaziladigan so‘rovnomani moliyalashtirish, qamrab olinadigan aholi qatlami, so‘rovnoma o‘tkazish muddati va so‘rovnoma natijalarining shakli bo‘yicha ham fikr almashildi.

Onlayn uchrashuv yakunida ishtirokchilar kelgusida ham Korrupsiyani qabul qilish milliy indeksini ishlab chiqish jarayonlarida va boshqa sohalarda hamkorlikni davom ettirishga kelishib oldilar.