Korrupsiyaga qarshi kurashish bo‘yicha 2021-2022 yillarga mo‘ljallangan davlat dasturi bilan Yevropa Kengashi doirasidagi Korrupsiyaga qarshi kurashish bo‘yicha davlatlar guruhi(GRECO)ga O‘zbekiston Respublikasining a’zo bo‘lish masalasini ko‘rib chiqish belgilangan bo‘lib, mazkur tashkilotga a’zo bo‘lish masalasi, jumladan, uning istiqboli va korrupsiyaga qarshi kurashish tizimi rivojiga ta’sir etuvchi omillar Agentlik va manfaatdor idoralar bilan birgalikda o‘rganib chiqildi. 

Shuningdek, xorijiy davlatlarning GRECOga a’zo bo‘lish tarixi va xususiyatlari bilan tanishish maqsadida Agentlik tomonidan chet el korrupsiyaga qarshi kurashish idoralari bilan ishchi uchrashuvlar tashkil etilmoqda.

Xususan, O‘zbekiston Respublikasi Korrupsiyaga qarshi kurashish agentligi vakillari hamda Qozog‘iston Respublikasi Korrupsiyaga qarshi kurashish agentligi Xalqaro hamkorlik boshqarmasi rahbariyati o‘rtasida onlayn uchrashuv bo‘lib o‘tdi. Muloqot davomida Qozog‘istonning GRECOga a’zo bo‘lish tajribasi, monitoring jarayonlari hamda baholash tizimi, shuningdek, Yevropa Kengashining tegishli konvensiyalarini ratifikatsiya qilish yuzasidan yuzasidan fikr almashildi. 

Uchrashuv yakunida tomonlar kelgusida ham ikki idora o‘rtasida hamkorlikni davom ettirish va rivojlantirish hamda o‘zaro tashriflarni amalga oshirgan holda tajriba almashish borasida kelishuvga erishdilar.