“Antikorrupsion haftaligi” doirasida joriy yilning 1 dekabr kuni Xalq ta’limi vazirligida “Ochiq eshiklar kuni” bo‘lib o‘tdi. Korrupsiyaga qarshi kurashish agentligi hamkorligida o‘tkazilgan mazkur tadbirda vazirlik rahbariyati, mutaxassislari hamda ommaviy axborot vositalari xodimlari ishtirok etdi.

Tadbir vazirlik faoliyatining keng jamoatchilik uchun ochiqligini ta’minlash hamda jurnalist, blogerlarni korrupsiyaga qarshi kurashish bo‘yicha tizimda amalga oshirilayotgan ishlar bilan yaqindan tanishtirish maqsadida tashkil etildi.  

Ta’kidlandiki, xalq ta’limi sohasida korrupsiyaga oid qonunbuzarlik holatlarining oldini olish va bartaraf etish yo‘nalishida vazirlik tomonidan bir qator tashkiliy va amaliy ishlar olib borilmoqda.

Xususan, vazirlikning Nazorat-huquqiy xizmati negizida Korrupsiyaga qarshi kurashish komplayens nazoratini amalga oshirish bo‘limi faoliyat yuritmoqda. Ushbu tuzilma korrupsiyaga qarshi kurash bo‘yicha «komplayens-nazorat» (compliance control) tizimini joriy etish va uni takomillashtirish, korrupsion xavf-xatarlarni o‘z vaqtida aniqlash, ularning sabablarini o‘rganish va bartaraf etish bo‘yicha takliflar ishlab chiqish kabi qator vazifalarni amalga oshirib kelmoqda.  

Tahlika-tahlillarga (risk-analiz) asoslanib o‘rganish, ya’ni masofadan monitoring qilish jarayonida shubhali holatlar tahlil qilinib, natijalariga ko‘ra mutaxassislarni ob’ektlarga yo‘naltirish yo‘lga qo‘yilgan.

Qayd etilishicha, vazirlik faoliyatida asosiy e’tibor moliyaviy xato va kamchiliklarning oldini olish bo‘yicha profilaktika chora-tadbirlarga qaratilmoqda. Xususan, joriy yilning o‘tgan davri davomida jami 368,6 mlrd. so‘mlik moliyaviy xato va kamchiliklarning oldi olinishi va bartaraf etilishiga erishilgan.

Shunga qaramasdan, yil boshidan hozirgi kunga qadar vazirlik tomonidan o‘tkazilgan nazorat tadbirlari natijasida jami 88,0 mlrd. so‘mlik moliyaviy xato-kamchiliklar aniqlangan. Shundan 27,5 mlrd. so‘mi o‘g‘rilik va kamomad sanaladi. 

Misol uchun, shu yil noyabr oyida Hisob palatasi birgalikda o‘tkazilgan tadbirlar natijasi ko‘rsatishicha, Andijon shahrida 11,5 mlrd. so‘m, Boyovut tumanida 11,0 mlrd. so‘m hamda Guliston shahrida 4,0 mlrd. so‘m miqdorida budjet mablag‘lari o‘zlashtirib yuborilgan.

Tarkibida jinoyat alomatlari bo‘lgan 159 ta 72,9 mlrd. so‘mlik o‘rganish materiallari huquqiy baho berish va qonuniy choralar ko‘rish maqsadida huquq-tartibot organlariga taqdim etildi.

Tadbirda vazirlikning Nazorat-huquqiy xizmati tomonidan korrupsiyaga qarshi kurashish borasida amalga oshirilayotgan ishlar bo‘yicha ham batafsil ma’lumot berildi. 

Xususan, hozirga qadar sohada aniqlangan yo‘l qo‘yilgan xato va kamchiliklari yuzasidan 243 nafar rahbar xodimlar egallab turgan lavozimlaridan ozod etilgan, 3 ming 415 nafariga nisbatan intizomiy jazo choralari ko‘rilgan, 151 ta holat bo‘yicha to‘plangan materiallar huquq-tartibot idoralariga yuborilgan.

O‘tgan davr davomida vazirlik tomonidan 264 ming 41 nafar xodim huquqlari himoya qilinib, 963 nafarining huquqi tiklangan bo‘lsa, 188 ta holatda boshqa davlat organlari tomonidan faoliyatga noqonuniy aralashuv va tekshiruvlarning oldi olingan.

Tadbirda vazirlik davlat budjetidan ajratilayotgan mablag‘larning samarali ishlatilishini ta’minlash, tizimdagi korrupsion xavf-xatarlar, moliyaviy xato va kamchiliklarni aniqlash, bartaraf etish va ularning oldini olish yuzasidan ishlarni izchil davom ettirilishini ma’lum qildi.