Joriy yilning 31 yanvar kuni Vazirlar Mahkamasining “Qurilish sohasida elektron davlat xaridlarini tashkil etish va amalga oshirish tartibini takomillashtirish chora-tadbarlar to‘g‘risida”gi 46-son qarori qabul qilindi.

Qarorda 2022 yil 1 martga qadar tegishli vazirlik va idoralar tomonidan xarid komissiyasi faoliyati bekor qilinib, uning funksiyasini platforma tomonidan avtomatik ravishda bajarish, qurilish sohasidagi davlat xaridlarini amalga oshirishda umumiy va texnik qismlar bo‘yicha ma’lumotni talab qilmaslik, davlat buyurtmachisi va pudrat tashkilotining affillanganlik xususiyatini avtomatik ravishda tekshirish, maqsadli dasturlarga kiritilgan ob’ektlarni raqamlashtirish tizimini joriy etish belgilandi.

Qaror bilan “Qurilish sohasida elektron davlat xaridlarini tashkil etish va amalga oshirish tartibi to‘g‘risida”gi Nizom tasdiqlanib, unga ko‘ra, endilikda maqsadli dasturlarga muvofiq moliyalashtiriladigan ob’ektlarni qurish, rekonstruksiya qilish va mukammal ta’mirlash uchun pudrat tashkilotlari faqat davlat xaridlari elektron tizimining elektron tender savdolari platformasi orqali aniqlanadi.

Ushbu tartib davlat buyurtmachilarining bir shartnoma bo‘yicha qiymati BHMning 6000 baravaridan ortiq bo‘lgan qurilish sohasidagi elektron tenderlarga nisbatan tatbiq etilib, mazkur miqdordan kam bo‘lgan qurilish sohasidagi elektron tenderlar uchun  tavsiyaviy ahamiyatga ega.

Tender predmetining boshlang‘ich narxi (QQS bilan) BHMning 200 000 baravarigacha bo‘lgan elektron tenderlarda faqat o‘sha hudud (Qoraqalpog‘iston Respublikasi, viloyatlar va Toshkent shahri)da yuridik shaxs sifatida ro‘yxatdan o‘tgan talabgorlar qatnashadi (Toshkent shahri va Toshkent viloyati yagona hudud deb qabul qilinadi).

Elektron tenderda ishtirok etish uchun takliflar berish muddati tugagan sanadan boshlab 2 ish kuni ichida platforma tomonidan tender g‘olibi aniqlanadi va g‘olib tashkilotga aksept yuboriladi. Aksept g‘olib tashkilot tomonidan tasdiqlangan kundan boshlab tender tugallangan deb hisoblanadi.

Elektron tender natijalari bo‘yicha g‘olib e’lon qilingan paytdan boshlab 3 kun muddatdan kechikmay pudrat shartnomasi tuziladi.

Mazkur Nizom talablariga muvofiq o‘tkaziladigan elektron tender bo‘yicha shikoyatlar, nizo va kelishmovchiliklarni ko‘rib chiqish uchun ishchi organ etib - Qurilish vazirligi belgilandi.

Nizom talabi asosida tuzilgan shartnomalar bo‘yicha qurilish muddatini uzaytirish, ob’ektning qiymatiga o‘zgartirish kiritish hamda qoldiq qiymatlarini qayta aniqlashtirish Qurilish vazirligining xulosasiga asosan amalga oshiriladi.

Qaror asosida o‘rnatilayotgan yangi tartiblarni joriy etish orqali qurilish sohasidagi davlat xaridlarini amalga oshirishda inson omilining aralashuvi oldi olinadi, korrupsiyaviy xavf-xatarlar kamayadi hamda bu borada shaffoflik ta’minlanishiga erishiladi.

Korrupsiyaga qarshi kurashish agentligi

Axborot xizmati