Joriy yilning 5 fevral kuni Ichki ishlar vazirligida “Yangi O‘zbekistonni korrupsiyadan holi mamlakatga aylantirishda birlashaylik!” mavzusida anjuman bo‘lib o‘tdi. Unda mamlakatimizda korrupsiyaga qarshi kurashish borasida amalga oshirilayotgan islohotlar, shuningdek, IIV tizimida sodir etilgan korrupsion holatlar tahlil qilinib, ushbu illatga qarshi kurashish boʻyicha koʻrilishi lozim boʻlgan taʼsirchan choralar muhokama qilindi.  

Tadbirda O‘zbekiston Respublikasi Korrupsiyaga qarshi kurashish agentligi vakillari ham mavzuga oid ma’ruzalar bilan ishtirok etdi. Jumladan, Agentlik xodimlari tomonidan O‘zbekiston Respublikasi Prezidentining «Korrupsiyaga qarshi kurashish ishlarining samaradorligini reyting baholash tizimini joriy etish chora-tadbirlari to‘g‘risida»gi Qarorining mazmun-mohiyati tushuntirildi.

Qayd etilganidek, mazkur Qarorga asosan korrupsiyaga qarshi kurashish ishlarining samaradorligini reyting baholash yo‘nalishlari bo‘yicha belgilangan indikatorlar va korrupsiyaga qarshi kurashish samaradorligi «qoniqarsiz» deb topilgan davlat tashkilotlari rahbarlariga belgilangan tartibda intizomiy javobgarlik choralarini qo‘llash masalasi ko‘rib chiqiladi.   

Anjumanda, shuningdek, mamlakat Prezidenti Shavkat Mirziyoyev tashabbusi bilan Ichki ishlar organlari sohasida amalga oshirib kelinayotgan  islohotlar xususida ham alohida so‘z yuritildi.

Ta’kidlandiki, o‘tgan davr mobaynida O‘zbekiston Respublikasining “Ichki ishlar organlari to‘g‘risida”gi qonuni va ichki ishlar organlarining faoliyatini tartibga soluvchi bir qator qaror va farmonlar qabul qilinib, tizimda faoliyat olib borayotgan xodimlarning ijtimoiy va moddiy ta’minotida ijobiy o‘zgarishlar amalga oshirildi. Biroq, shunga qaramasdan, o‘tgan davr mobaynida IIOlari tomonidan pora olish, pora olish va berishda ishtirok etish, firibgarlik, mansab soxtakorligi kabi korrupsion holatlar sodir etilgan.

Xususan, korrupsiyaga qarshi kurashish agentligiga 2021 yilda kelib tushgan jami 4 901 ta murojaatning  343 tasi yoki 7 foizi ichki ishlar organlari xodimlarining xatti-harakatlari va qarorlaridan norozi bo‘lgan holda yuborilgan murojaatlarni tashkil qiladi.

Tahlillarga koʻra, 2020-yilda IIOlarining 46 nafar xodimi korrupsion jinoyatlar sodir etganligi uchun jinoiy javobgarlikka tortilgan. 2021-yilda esa bu koʻrsatkich deyarli 2 baravarga ortib, 89 nafar xodim tomonidan 119 ta korrupsion jinoyatlar sodir etilgan.

Shundan:

– 47 tasi JKning 206-moddasi;

–18 tadan JKning 209 va 211-moddasi;

–14 tasi JKning 168-moddasi;

 –13 tasi JKning 210-moddasi va qolgan 9 tasi boshqa korrupsion jinoyatlarni tashkil qiladi.

Tadbirda respublikadagi kriminogen vaziyati murakkab bo‘lgan hududlarning huquq-tartibot idoralari faoliyatini o‘rganish maqsadida aholi o‘rtasida anonim tarzda o‘tkazilgan so‘rov xususida ham to‘xtalib o‘tildi.

Mazkur so‘rovnomada jami 5883 nafar fuqaro va 4067 nafar IIOlari xodimlari ishtirok etdi. Aholining barcha qatlamlarini qamrab olish maqsadida so‘rovnoma har bir hududdagi korxona, idora va tashkilotlar, oliy o‘quv yurtlari, tibbiyot muassasalari, mahallalar hamda aholi ko‘p to‘planadigan joylarda o‘tkazildi. So‘rov asosida huquq-tartibot idoralaridagi korrupsiyaviy holatlarga sabab bo‘luvchi omillar aniqlandi.

Anjumanda ularning har biri atroflicha tahlil qilindi, shuningdek,  korrupsiyaviy holatlarning oldini olish va bartaraf etishga qaratilgan preventiv mexanizmlarni ishlab chiqish choralari ko‘rilayotgani qayd etildi.

Korrupsiyaga qarshi kurashish agentligi

Axborot xizmati