Mamlakatimizda davlat va jamiyat hayotining har bir jabhasida korrupsiya holatlarini barvaqt aniqlash va oldini olish, ularning sabab va shart-sharoitlarini bartaraf etish, manfaatlar to‘qnashuviga yo‘l qo‘ymaslik hamda korrupsiyaga nisbatan murosasiz munosabatni shakllantirishda  xalqaro standartlar va zamonaviy usullarni joriy etilayotgani o‘zining ijobiy samarasini bermoqda. 

Xususan, davlat idoralari va tashkilotlarida korrupsiyaga qarshi kurashish bo‘yicha Komplayens-nazorat tizimi amaliyotga tatbiq etilmoqda. Bunday tuzilmalar korrupsiyaga qarshi kurashishda xalqaro standartlar talablariga javob beruvchi kompleks tizim yaratish va rivojlantirishga katta hissa qo‘shmoqda.

Jumladan,  O‘zbekiston bank tizimida ilk bor korrupsiyaga qarshi kurashish  bo‘yicha ISO 37001:2016 xalqaro sertifikati qo‘lga kiritilgani ham  buning o‘ziga xos dalilidir. 

Joriy yilning 18 fevral kuni xalqaro ekspertlar tomonidan “Trastbank” rahbariyatiga ushbu xalqaro standartga muvofiqlikni tasdiqlovchi xalqaro sertifikat topshirildi. 

ISO 37001:2016 tashkilotda korrupsiyaga qarshi kurashning samarali tizimini yaratishning xalqaro usullarini o‘zida jamlagan, korrupsiyaga qarshi mukammal boshqaruv tizimini yo‘lga qo‘yishga xizmat qiladigan xalqaro standartdir. 

Mazkur xalqaro sertifikat endilikda bankda korrupsiyaga qarshi boshqaruv tizimini ishlab chiqish, joriy etish, tahlil qilish va takomillashtirish uchun talab va ko‘rsatmalarni belgilab beradi. 

Korrupsiya qarshi kurashish agentligi 
Axborot xizmati