Kecha 17 fevral kuni Prezident Shavkat Mirziyoev huzurida 2022-yilda bojxona maʼmurchiligini yanada takomillashtirish va sohani korrupsiyadan xoli tizimga aylantirish boʻyicha ustuvor vazifalar yuzasidan yigʻilish boʻlib oʻtdi. 

Yigʻilishda davlatimiz rahbari tomonidan bojxona tizimida “korrupsiyadan xoli” dasturini amalga oshirish soha rahbarlarining eng ustuvor vazifasi boʻlishi shart ekanligi alohida qayd etildi.

Bu borada avvalambor, Prezident topshirigʻiga koʻra, sohada zamonaviy komplayens tizimi joriy qilinadi. Bunda:

✅ 1-maydan boshlab yuk deklaratsiyasini rasmiylashtirish postlardan chiqariladi va tadbirkor bilan bevosita muloqotsiz, masofaviy amalga oshiriladi;

✅1-iyuldan tovarlar kodi va qiymatini belgilash, bojxona koʻrigini oʻtkazish, imtiyozli deklaratsiya rasmiylashtirishda korrupsion xavflar avtomatlashgan tizim orqali aniqlanadi;

✅ 1-sentyabrdan boshlab barcha elektron bojxona xizmatlari “yagona darcha” tizimi orqali koʻrsatiladi;

✅yil yakuniga qadar bojxona koʻrigi jarayonlarini toʻliq qamrab olgan elektron tizim ishga tushiriladi.

Umuman, bojxona xizmatlarini raqamlashtirishni 2022-yilda 70 foizga, 2023-yilda 100 foizga yetkazish boʻyicha dastur qabul qilish vazifasi qoʻyildi.

Yigʻilishda bojxona xodimlarining halol ishlashini taʼminlash va ularning ijtimoiy himoyasini kuchaytirish - korrupsiyaga qarshi kurashishda eng muhim masala ekanligi taʼkidlandi.

Shu munosabat bilan:

➖bir oy muddatda bitta postda 3 yil ishlagan xodimlar rotatsiya qilinadi;

➖ 1-martdan barcha bojxona xodimlari faqat ochiq tanlov asosida ishga qabul qilinadi;

➖bojxona tizimida xodimlar daromadi va mol-mulkini deklaratsiya qilish joriy etiladi;

➖ bojxona xodimlarining faoliyati samarasiga qarab, ish haqiga 50 foizgacha qoʻshimcha ustama toʻlanadi. Bu ustamalar aniq koʻrsatkichlar (KPI) asosida belgilanadi;

➖ olis va sharoiti ogʻir postlarda ishlayotgan xodimlar ish haqiga qoʻshimcha ustamalar joriy etiladi;

➖bojxona xodimlariga maxsus unvon uchun ustamalar miqdori oshiriladi.

Korrupsiyaga qarshi kurashish agentligi

Axborot xizmati