Agentlik tomonidan respublikamiz hududlarida “Davlat organlari va tashkilotlari faoliyati ochiqligini taʼminlash” mavzusida oʻtkazib kelinayotgan seminarlarning navbatdagisi Qorqalpogʻiston Respublikasi Vazirlar kengashi hamda Xorazm viloyatida tashkil etildi.

Seminarlarda Axborot siyosati va mahalliy davlat organlarida ochiqlikni taʼminlash masalalari boʻyicha doimiy komissiya aʼzolari hamda davlat organlari va tashkilotlari faoliyati ochiqligini taʼminlash uchun masʼul mutaxassislari ishtirok etdi. 

Ushbu muloqotlarning asosiy maqsadi mamlakatimiz Prezidentining “Davlat organlari va tashkilotlarining faoliyati ochiqligini taʼminlash, shuningdek, jamoatchilik nazoratini samarali amalga oshirishga doir qoʻshimcha chora-tadbirlar toʻgʻrisida”gi PF-6247-son Farmoni  bilan tasdiqlangan Ochiq maʼlumotlar sifatida joylashtirilishi kerak boʻlgan ijtimoiy ahamiyatga molik maʼlumotlarning oʻz vaqtida va toʻliq  eʼlon qilib borilishini taʼminlash qaratilgan.   

Shu maqsadda seminarlar davomida Farmon talablaridan kelib chiqib, mazkur hududlardagi davlat organlari va tashkilotlarining rasmiy veb-saytlari va ochiq maʼlumotlar portalida ijtimoiy ahamiyatga molik maʼlumotlarning joylashtirilishi boʻyicha uchrayotgan nuqsonlar, sustkashliklar atroflicha tahlil qilindi.  

Jumladan, Agentlik tomonidan Qoraqalpogʻiston Respublikasi boʻyicha oʻtkazilgan masofaviy monitoring yakuniga koʻra, mavjud 17 ta tuman va shahar hokimliklarining 12 tasi Internet tarmogʻida oʻz rasmiy veb-saytini tashkil etgan. Veb-saytlarda Farmonda belgilangan ochiq maʼlumotlar faqatgina 2 ta tuman hokimliklari tomonidan qisman joylashtirilgan, xolos.

 
Xorazm viloyatidagi mavjud 13 ta tuman va shahar hokimliklarining 11 tasi rasmiy veb-saytiga ega boʻlib, ularning hech birida ochiq maʼlumotlar umuman joylashtirilmagan. 2 ta tuman va shahar hokimliklarining veb-sayti esa ishchi holatida emas.

Viloyatda  Farmonning mahalliy kengashlar sessiyalarini telekanallar, shuningdek, Internet tarmogʻi orqali jonli efirga uzatishni taʼminlashga oid talabi ham toʻliq ijro etilmagan. Xususan, 2021-yil 1-dekabrdan joriy yilning 10-yanvar kuniga qadar boʻlgan davrda Xalq deputatlari Xorazm viloyat, tuman va shahar kengashlari tomonidan jami 36 ta sessiya oʻtkazilgan boʻlib, ulardan 26 tasi yoki 76 foizi toʻgʻridan-toʻgʻri efirga uzatilmagan. Yoki jonli efirga uzatilgan sessiyalar ham toʻliq translyatsiya qilinmagan. 

Seminarlarda shu kabi xato va kamchiliklar  atroflicha muhokama qilinib, Agentlik xodimlari tomonidan ochiqlikka oid qonunchilik hujjatlariga rioya etish, maʼlumotlarni belgilangan resurslarda  oʻz vaqtida, toʻliq va sifatli  joylashtirish boʻyicha ishtirokchilarga tushuntirish berildi. 

 Xususan, ochiq axborot turi, ularni joylashtiriladigan resursi va tartibi, taqdim etish va yangilash muddati kabi muhim masalalarga alohida toʻxtalib oʻtildi.

Korrupsiyaga qarshi kurashish agentligi

Axborot xizmati