Korrupsiyaga qarshi kurashish agentligiga “Harbiy Savdo-Chirchiq” DUK mansabdorlarining noqonuniy xatti-harakatlari, jumladan, juda koʻp miqdordagi mulklarni talon-toroj qilish, oʻz mansab va xizmat mavqeidan qonunga hilof ravishda foydalanib, pul mablagʻlarini oʻzlashtirish, “Davlat xaridlari toʻgʻrisida”gi qonun hujjatlarini buzish va boshqa turdagi iqtisodiy jinoyatlar sodir etib kelinayotganligi boʻyicha fuqarolardan kelib tushgan murojaat asosida mazkur korxonada oʻrganish oʻtkazildi.

Oʻrganish davomida korxona moddiy javobgar shaxslari tomonidan mehnat munosabatlari, davlat xaridlari tartibini belgilovchi hamda boshqa qonun hujjatlarining buzilishi natijasida korxona faoliyatida jami 15,3 mlrd soʻmlik moliyaviy xato va kamchiliklarga yoʻl qoʻyilganligi aniqlandi.

Oʻrganish yakunlari boʻyicha toʻplangan hujjatlar Oʻzbekiston Respublikasi JPKning 329-330-moddalariga asosan qonuniy qaror qabul qilish uchun 2022-yil 24-fevral kuni Oʻzbekiston Respublikasi Bosh prokuraturasiga yuborildi.

Holat yuzasidan Oʻzbekiston Respublikasi Harbiy prokuraturasi tomonidan tergovga qadar tekshiruv harakatlari oʻtkazilib, 2022-yil 12-mart kuni “Harbiy Savdo-Chirchiq” DUK moddiy javobgar shaxslariga nisbatan Oʻzbekiston Respublikasi Jinoyat kodeksining 167-moddasi 2-qismi “g” bandi bilan jinoyat ishi qoʻzgʻatildi. 

Hozirda dastlabki tergov harakatlari olib borilmoqda.

Korrupsiyaga qarshi kurashish agentligi

Аxborot xizmati