Joriy yilning 18 aprel kuni Jahon Banki eksperti Dmitro Kotlyar tomonidan videokonferensaloqa orqali trening tashkil etildi.

Seminarda Agentlikning korrupsiyaning oldini olish va «komplayens nazorat» tizimini joriy etish boshqarmasi mas’ul xodimlari, shuningdek davlat organlari va tashkilotlarining ichki nazorat tuzilmalari vakillari (40 dan ortiq) ishtirok etdilar.

Treningda korrupsion xavflarni boshqarish bo‘yicha tushunchalar va xalqaro vositalar, baholashning asosiy yo‘nalishlari, xalqaro tajriba va O‘zbekiston sharoitida amalga oshirilishi mumkin bo‘lgan muhim qadamlar muhokama qilindi.

Xususan, korrupsion xavflarni boshqarish va korrupsiyaning oldini olishda ISO 37001:2018/2016 xalqaro standartlarining joriy etilishi, mazkur yo‘nalishdagi xorijiy davlatlar (Janubiy Koreya, Ukraina, Moldova, Fransiya va Malayziya)ning tajribasi va faoliyati, korrupsiyaviy xavf-xatarlarni baholash mezonlari yuzasidan tajriba almashildi.

Tadbir yakunida ishtirokchilar tomonidan berilgan savollar atroflicha muhokama qilindi.

Korrupsiyaga qarshi kurashish agentligi 
Axborot xizmati