Joriy yilning 25-aprel kuni Oʻzbekiston delegatsiyasi hamda AQSH Hukumat etika agentligi (HEA) vakillari - Elizabet Horton  hamda Sara Nekou  oʻrtasida onlayn uchrashuv oʻtkazildi. 

Maʼlumot uchun: AQSH Hukumat etika agentligi 130 dan vazirlik va davlat idoralarda faoliyat yurituvchi 2,5 mln. nafar davlat xizmatchilarining odob-axloq qoidalariga rioya etishlarini nazorat qiladi. Shuningdek, agentlik davlat xizmatida manfaatlar toʻqnashuvini tartibga solish va unga yoʻl qoʻyilishining oldini olish boʻyicha vakolatli organ hisoblanadi.
Muloqotda amerikalik mutaxassislar tomonidan AQShda manfaatlar toʻqnashuvining oldini olish boʻyicha koʻrilayotgan asosiy choralar, xususan, bu borada HEAning faoliyati va tutgan oʻrni haqida maʼlumot berildi.

Shuningdek, HEAning davlat xizmatchilari va  mansabdor shaxslarni odob-ahloq qoidalari borasida oʻqitish ishlarini tashkil etish, davlat xaridlarida ochiq raqobatni taʼminlash va manfaatlar toʻqnashuvini tartibga solish boʻyicha tajribasi muhokama qilindi. 

Muloqot yakunida HEA tomonidan Oʻzbekistonda davlat xizmatida halollik standartlarint joriy etish va odob-ahloq qoidalarining tadbiq etilishiga uslubiy koʻmak koʻrsatish, seminar-treninglar tashkil etish, korrupsiyaning oldini olish boʻyicha maxsus oʻquv dasturlarihva qoʻllanmalarni ishlab chiqish boʻyicha kelishuvga erishildi. Bundan tashqari, Korrupsiyaga qarshi kurashish agentligi va HEA oʻrtasida oʻzaro tizimli tajriba almashish boʻyicha 2022-2023-yillarga moʻljallangan Oʻzaro hamkorlik dasturini ishlab chiqish masalalari koʻrib chiqildi. 

Shu kuni vakillarimizning Atlantika Kengashi Yevroosiyo markazi direktori Jon Xyorbst  bilan uchrashuvi ham tashkil etildi. 

Maʼlumot uchun: Atlantika Kengashi global muammolarni hal qilishda Atlantika hamjamiyatining rolidan kelib chiqib, konstruktiv yetakchilik va xalqaro ishlarda ishtirok etishga yordam beradi. Kengash iqtisodiy va siyosiy oʻzgarishlarni muhokama qilish uchun zarur forumni taʼminlaydi. 

Muloqotlar mobaynida Atlantika Kengashida amalga oshiriladigan ishlar, AQSH va boshqa mamlakatlarda Kengash va korrupsiyaga qarshi kurash idoralari oʻrtasidagi oʻzaro hamkorlik tizimi xususida soʻz yuritildi.  

Yakunda Atlantika Kengashi bilan hamkorlikda korrupsiyaning ijtimoiy-iqtisodiy islohotlarga taʼsirini baholashni tahlil qilish va tadqiqotlar oʻtkazish boʻyicha qoʻshma ekspert-tahlil guruhini tashkil etish hamda bu borada axborot va tahliliy materiallar almashishga kelishib olindi.

Korrupsiyaga qarshi kurashish agentligi
Axborot xizmati