AQShda boʻlib turgan Oʻzbekiston delegatsiyasi joriy yilning 27-aprel kuni World justice project (WJP) xalqaro tashkiloti ijrochi direktori Elizabet Andersen bilan uchrashdi. 

Maʼlumot uchun: WJP butun dunyo boʻylab qonun ustuvorligini taʼminlash uchun mamlakatlarning salohiyatini oshirish, xabardorlikni oshirish va harakatlarni ragʻbatlantirishga qaratilgan choralarni amalga oshiradi. Mazkur xalqaro tashkilot 130 dan ziyod mamlakatlarda oʻz faoliyatini olib boradi.

WJP tashkiloti sohada dunyoning yetakchi reyting va indekslaridan biri boʻlgan "Huquq ustuvorligi indeksi"ni shakllantiradi va eʼlon qilib boradi.
2021-yil natijalariga koʻra, ushbu indeksda Oʻzbekiston 14 pogʻona yuqorilab, 139 ta mamlakat orasida 85-oʻrinni egallagan va bu borada eng yaxshi natija koʻrsatgan 3 ta davlatdan biriga aylandi.

Indeksning "korrupsiya mavjud emasligi" indikatori boʻyicha esa Oʻzbekiston 89-oʻrindan birdaniga 19 pogʻona koʻtarilib, 70-oʻrinni egallagan.
Mazkur indeks  Korrupsiyani qabul qilish xalqaro indeksini shakllantirish manbalaridan biri hisoblanadi. 

Taʼkidlanganidek, "Huquq ustuvorligi" indeksi interaktiv tarzda barcha yoʻnalishlardagi maʼlumotlarni raqamlar, foizlar, mintaqaviy va dunyo boʻylab oʻrtacha hisoblarda aks ettirib beradi. Bu esa koʻrsatkichlarning barcha uchun birdek tushunarli boʻlishiga xizmat qiladi.

Uchrashuvda Agentlik tomonidan korrupsiyaga qarshi kurashish sohasida amalga oshirilayotgan ijtimoiy tadqiqotlarda tashkilotning manbalari, metodologiyalaridan foydalanish imkoniyatlari yuzasidan oʻzaro fikr almashildi. Shuningdek, Oʻzbekistonning reyting koʻrsatkichlarida oʻsish va pasayishiga oid maʼlumotlar, ularning sabablarini tahli qilish hamda tavsiyalarni ishlab chiqishda hamkorlik qilish masalalari muhokama qilindi.

Muzokaralar yakuniga koʻra, tomonlar Oʻzbekistonning korrupsiyani qabul qilish milliy indeksini ishlab chiqishda yaqindan hamkorlik qilishga kelishib olishdi.

Bundan tashqari, korrupsiyaga qarshi kurashish yoʻnalishida tashkilot tomonidan olib boriladigan ilmiy tadqiqotlar va ulardagi asosiy jihatlar, davlat tashkilotlari, huquqni muhofaza qiluvchi organlar bilan hamkorlik, korrupsiya yoʻnalishida omma orasida keng tarqalgan media xabarlarning davlatlar indeksi shakllanishidagi oʻrni va ahamiyati kabi masalalarga alohida eʼtibor qaratildi.

Korrupsiyaga qarshi kurashish agentligi
Axborot xizmati