Yosh avlodni tarbiyalab kelayotgan maktabgacha taʼlim tizimi vakillarining byudjet mablagʻlarini talon-taroj qilishi, poraxoʻrlik jinoyatlarini sodir etishi achinarli. Ming afsuski, Namangan viloyat maktabgacha taʼlim boshqarmasi va uning quyi tizimlarida ana shunday salbiy holatlar boshqa hududlarga nisbatan koʻproq kuzatilmoqda. 

Xususan, 2021-yil viloyatda xalq taʼlimi tizimida faoliyat yuritgan 18 nafar shaxsga nisbatan 12 ta jinoyat ishi sudga yuborilgan. Ular oʻzlashtirish yoki rastrata yoʻli bilan talon-toroj qilish, pora olish, pora olish-berishda vositachilik qilish kabi jinoyatlarni sodir qilgan. Mazkur jinoyatlarga qoʻl urganlarning barchasi tuman va shahar miqyosidagi maktabgacha taʼlim muassasalarining xodimlari hisoblanadi.

Mazkur masala Namangan viloyat korrupsiyaga qarshi kurashish hududiy kengashining kecha boʻlib oʻtgan yigʻilishida ham muhokamalar markazida boʻldi. Mavzu yuzasidan viloyat prokurori, Maktabgacha taʼlim boshqarmasi rahbari va boshqa masʼullarning axboroti tinglandi.  

Maʼlum qilinishicha, viloyat maktabgacha taʼlim boshqarmasi, vazirlikning Namangan viloyat boʻyicha ichki audit, moliyaviy va huquqiy nazorat boʻlimi hamkorligida 2021-yil davomida jami 34 ta maktabgacha taʼlim boʻlimi va muassasalarida tekshirishlar oʻtkazilib, aniqlangan xato va kamchiliklarga oid hujjatlar qonuniy baho berish uchun huquqni muhofaza qilish organlariga yuborilgan. Moliyaviy xato va kamchiliklarga yoʻl qoʻygan yoki bunga bevosita aloqador boʻlgan 39 nafar rahbar va boshqa masʼul xodimlarga nisbatan javobgarlik masalasi koʻrib chiqilgan. 

Taʼkidlandiki, bu kabi korrupsion holatlar viloyatda korrupsiyaga qarshi kurashish borasida ishlar talab darajasida olib borilmayotgani natijasida yuzaga kelmoqda. 

Yana bir muhim  masala — Davlatobod tumanida “Korrupsiyasiz hudud” loyihasida belgilangan vazifalar, chora-tadbirlar ijrosining bugungi kundagi holatiga jiddiy eʼtibor qaratildi.  

Qayd etilganidek, mazkur loyihani amalga oshirish maqsadida Korrupsiyaga qarshi kurashish agentligi va Namangan viloyat hokimligi tomonidan “Yoʻl xaritasi” tasdiqlangan. Biroq, loyiha doirasida targʻibot va jamoaviy tadbirlardan boshqa biror amaliy ish olib borilmagan, belgilangan vazifalar oʻz holiga tashlab qoʻyilgan. 

Yigʻilishda bu kabi sustkashlik va masʼuliyatsizlik keskin tanqid qilinib, mazkur masalani hududiy Kengash yigʻilishida tanqidiy muhokama qilish, oʻz vazifasini lozim darajada bajarmagan masʼullarning javobgarligi masalasini koʻrib chiqish lozimligi qayd etildi. 

Yuqoridagilardan kelib chiqib, viloyatda korrupsiyaga qarshi kurashish tizimini tubdan qayta koʻrib chiqish, bu borada ayniqsa, hududiy Kengash faolligini oshirish, uning aʼzolari masʼuliyatini kuchaytirish yuzasidan bir qator aniq maqsad va vazifalar belgilab  olindi.

Korrupsiyaga qarshi kurashish agentligi

Axborot xizmati