Maʼlumki, Agentlik davlat organlari va tashkilotlarida korrupsiyaga qarshi ichki nazorat tuzilmalarini joriy etish hamda samarali faoliyat yuritishini tashkillashtirish vazifasini amalga oshirib kelmoqda.

Xususan, Oʻzbekiston Respublikasi Prezidentining joriy yil 12-yanvardagi “Korrupsiyaga qarshi kurashish ishlarining samaradorligini reyting baholash tizimini joriy etish chora-tadbirlari toʻgʻrisida”gi qaroriga asosan Agentlik tomonidan Korrupsiyaga qarshi kurashish ishlarining samaradorligini reyting baholash tizimi yoʻlga qoʻyildi.

Hozirda «E-Anticor.uz» elektron platformasi orqali eksperiment tariqasida 24 ta davlat organlari va tashkilotlarining korrupsiyaga qarshi kurashishdagi samaradorligi tahlil qilinmoqda.

Ushbu platformaga davlat organlari va tashkilotlari tomonidan 2021-yil va 2022-yilning 1-choragida korrupsiyaga qarshi kurashish boʻyicha amalga oshirilgan ishlari haqida maʼlumotlar kiritildi.

Reyting baholash natijalari xolisligini taʼminlash maqsadida davlat organlari va tashkilotlari tomonidan elektron platformaga kiritilgan mazkur maʼlumotlar mustaqil ekspertlar guruhi tomonidan ham koʻrib chiqilmoqda.

Joriy yilning 11-may kuni qabul qilingan “Davlat boshqaruvi sohasida korrupsiyaviy xavf-xatarlarni bartaraf etish mexanizmlarini takomillashtirish va ushbu sohada jamoatchilik ishtirokini kengaytirish chora-tadbirlari toʻgʻrisida”gi Prezident qarori bu boradagi ishlarni takomillashtirishda yana bir muhim qadam boʻldi.

Qarorga muvofiq, 2022-yil 1 sentyabrdan boshlab, “E-Anticor.uz” elektron platformasida davlat hokimiyati va boshqaruvi organlari, shu jumladan, ularning hududiy boʻlinmalari, davlat unitar korxonalari va muassasalari, davlat ulushi 50 foizdan yuqori tashkilotlarning faoliyatida korrupsiyaviy xavf-xatarlarni majburiy aniqlash va baholashni nazarda tutuvchi "E-Antikorrupsiya" loyihasi toʻliq ishga tushiriladi.

Agentlik tomonidan "Korrupsiyaga moyil boʻlgan munosabatlar elektron reyestri" (“past”, “oʻrta” va “yuqori” oʻlchovlarida) shakllantiriladi va Internet tarmogʻida ochiq eʼlon qilib boriladi. Har bir aniqlangan korrupsiyaviy xavf-xatarlarning tavsifi va darajasi, ularni bartaraf etish boʻyicha choralarni oʻz ichiga oluvchi korrupsiyaviy xavf-xatarlar xaritalarini tuzish amaliyoti yoʻlga qoʻyiladi.

Qonunchilikdagi shu kabi muhim yangiliklar hamda ularda belgilangan talablarni oʻz vaqtida va sifatli bajarilishini taʼminlash maqsadida Agentlik tomonidan Konrad Adenaur nomidagi jamgʻarmaning Markaziy Osiyo boʻyicha mintaqaviy vakolatxonasiga  koʻmagida joriy yilning 30-31-may kunlari “Korrupsiyaga qarshi kurashishda ustuvor vazifalarni belgilash, mamlakatda korrupsiyaning oldini olishning zamonaviy vositalarini joriy etish” mavzusida navbatdagi seminar-trening tashkil etildi.

Ushbu tadbir vazirlik va idoralar, mahalliy hokimliklari korrupsiyaga qarshi ichki nazorat tuzilmalarining 220 nafardan ortiq rahbar va xodimlari uchun oʻzaro tajriba almashish, malaka va koʻnikmalarini oshirish uchun faol muloqot maydoni boʻldi.

Taʼkidlanganidek, hozirgi vaqtda jami 117 ta davlat va xoʻjalik boshqaruvi organlari, davlat korxonalari va ustav kapitalida davlat ulushi boʻlgan korxonalar, shu jumladan, banklarda korrupsiyaga qarshi ichki nazorat tuzilmalari faoliyati yoʻlga qoʻyilgan.

Joriy yilning 1-choragida korrupsiyaga qarshi ichki nazorat tuzilmalari tomonidan 22 ta davlat tashkilotlari va idoralarida jami 81 mlrd 561,1 mln soʻmlik moliyaviy xato va kamchiliklar aniqlangan.

Bundan koʻrish mumkinki, aksariyat davlat tashkilotlarida korrupsiyaga qarshi ichki nazorat tuzilmalari faoliyati toʻgʻri yoʻlga qoʻyilib, oʻz faoliyati natijasi yuzasidan ijobiy natijalarni bermoqda.

Ammo korrupsiyaga qarshi ichki nazorat tuzilmalari faoliyatini barcha davlat tashkilotlarida toʻgʻri yoʻlga qoʻyish, ularning samaradorligini oshirish, ular tomonidan korrupsiyaviy xavf-xatarlarni baholash amaliyotini toʻliq shakllantirish borasida hal etilishi va  amalga oshirilishi lozim boʻlgan vaziflar hali talaygina.

Shu bois ushbu trening korrupsiyaga qarshi ichki nazorat tuzilmalari faoliyatining samaradorligini oshirish, ularning faoliyatida koʻp uchraydigan savollarni ochiq muhokama qilish, faoliyatni tartibga soluvchi me’yoriy hujjatlarni amaliyotga tatbiq etishdagi mummolar va korrupsiyaviy xavf-xatarlarni baholash bilan bogʻliq masalalar yuzasidan fikr almashish hamda bu borada uslubiy yordam koʻrsatishni kuchaytirish maqsadida tashkil etilmoqda.

Unda mutaxassislar tomonidan davlat tashkilotlari faoliyatida korrupsiyaviy xavf-xatarlarni toʻgʻri baholash, manfaatlar toʻqnashuvini aniqlash va boshqarish, davlat xaridlari jarayonlarida kontragentlarni tekshirish, korrupsiyaviy xatti-harakatlar yuzasidan xizmat tekshiruvi oʻtkazish, korrupsiyaga qarshi kurashish ishlarining samaradorligini reyting baholash tizimi va boshqa muhim mavzularda taqdimotlar oʻtkaziladi. 

Trening davomida ishtirokchilar sohaga oid muhim va foydali  maʼlumotlarni olish bilan birga oʻzlarini qiziqtirgan savollarga mutaxassislar orqali aniqlik kiritish hamda faoliyatlarida duch kelayotgan muammo va kamchiliklarni ochiq muhokama qilish imkoniga ega boʻladilar.

Korrupsiyaga qarshi kurashish agentligi 
Axborot xizmati