Joriy yilning 4-5-iyul kunlari Shveysariya Konfederatsiyasida boʻlib turgan Korrupsiyaga qarshi kurashish agentligi direktori  boshchiligidagi Oʻzbekiston delegatsiyasining ushbu mamlakatning Bosh prokuraturasi, Federal audit idorasi, “Transparency International Switzerland” tashkiloti, shuningdek Korrupsiyaga qarshi kurashish boʻyicha idoralararo ishchi guruh rahbariyati bilan uchrashuvlari tashkil etildi. 

Uchrashuvlarning asosiy masqadi tizimdagi korrupsiyaviy xavf-xatarlarni baholash hamda korrupsiyaga qarshi kurashish sohasida oʻzaro hamkorlikni yoʻlga qoʻyishdan iborat boʻldi.

Tomonlar korrupsiyaning oldini olishda zamonaviy axborot texnologiyalari keng joriy etish, jinoyatlar doirasida olib ketilgan aktivlarni qaytarish, davlat mablagʻlaridan foydalanish monitoringi va bu jarayonning shaffofligini taʼminlash, davlat xaridlari sohasidagi huquqbuzarliklar toʻgʻrisida xabar berish tizimi hamda mazkur sohada nodavlat tashkilotlar bilan hamkorlik mexanizmlari yuzasidan atroflicha fikr almashdilar.

Maʼlumot uchun: Bugungi kunda Shveysariya Bosh prokuraturasi tomonidan 6 mlrd. yevro miqdoridagi noqonuniy mablagʻlar muzlatib qoʻyilgan boʻlib, shundan 2mlrd. yevro miqdoridagi mablagʻlar xorijiy mamlakatlar vakillarining aktivlari hisoblanadi.

Korrupsiyaga qarshi kurashish boʻyicha idoralararo ishchi guruh – Shveysariyaning korrupsiyaga qarshi kurashish sohasida davlat siyosatini shakllantirish va amalga oshirish uchun masʼul boʻlgan organ hisoblanadi. Uning tarkibiga federal darajadagi barcha davlat idoralari va Bosh prokuratura vakillari kiradi.

Uchrashuvlar yakunida istiqboldagi hamkorlikni amalga oshirish maqsadida Oʻzbekiston Korrupsiyaga qarshi kurashish agentligi hamda Shveysariya Korrupsiyaga qarshi kurashish boʻyicha idoralararo ishchi guruhi oʻrtasida ikki tomonlama oʻzaro anglashuv Memorandumini imzolash yuzasidan kelishuvga erishildi.

Korrupsiyaga qarshi kurashish agentligi

Axborot xizmati