Joriy yilning 25-26-iyul kunlari Iqtisodiy hamkorlik va taraqqiyot tashkilotining Sharqiy Yevropa va Markaziy Osiyo uchun Korrupsiyaga qarshi kurash tarmog‘i (ACN) tomonidan “Yuqori darajadagi korrupsiya to‘g‘risida ACN matritsasi” mavzusida onlayn trening tashkil etildi.

Ma’lumot uchun: Matritsa Korrupsiyaga qarshi kurashish tarmog'i tomonidan o‘tkazilgan monitoring natijalari, GRECO, “Transparency International” va boshqa  tashkilotlarning tahlillaridan kelib chiqib, yuqori darajadagi mansabdor shaxslar tomonidan sodir etilgan korrupsiyaga oid ishlarni tahlil qilish maqsadida ishlab chiqilgan. 

Matritsa – Sharqiy Yevropa va Markaziy Osiyoda qayd etilgan ushbu turdagi ishlarning ma’lumotlar bazasi bo‘lib xizmat qilishi nazarda tutilgan.

Matritsani shakllantirishdan maqsad – yuqori darajadagi mansabdor shaxslar orasida korrupsiyaga qarshi kurashish yuzasidan puxta siyosatni ishlab chiqish uchun batafsil, chuqur tahlilga ega bo‘lish va huquqni muhofaza qiluvchi organlar salohiyatini kuchaytirishdan iborat.

Treningda Korrupsiyaga qarshi kurashish agentligi, Bosh prokuratura, Oliy sud, Adliya vazirligi, Ichki ishlar vazirligi, Moliya vazirligi, Hisob palatasi va boshqa vazirlik va idoralarning 20 nafardan ziyod vakillari, shuningdek, Qozog‘iston, Qirg‘iziston va Tojikiston Respublikalari vakillari ishtirok etdi.

Tadbir davomida Korrupsiyaga qarshi kurash tarmog‘i rahbari Olga Savran hamda ekspertlari Andrey Kuxaruk, Dinara Afaunova va Noel Merile tomonidan matritsaning ishlab chiqilishi tarixi, uning asosiy maqsadlari, Matritsa shakli, uning manbalari, davriyligi, ma’lumotlarni to‘plash va tahlil qilish, korrupsiya bo‘yicha ishlarning Matritsaga kiritilishi uchun talablar va ularni muhokama qilish masalalari haqida ma’lumotlar berib o‘tildi.

Ishtirokchilarda to‘liq tasavvur hosil bo‘lishi uchun Matritsani shakllantirish bo‘yicha amaliy mashg‘ulotlar tashkil etildi hamda misollar yordamida ma’lumotlarni kiritish tartiblari tushuntirildi.

Trening davomida ishtirokchilar muhokama qilingan mavzular yuzasidan ekspertlardan o‘zlarini qiziqtirgan savollarga javob olishdi.

Korrupsiyaga qarshi kurashish agentligi

Axborot xizmati