Korrupsiyaga qarshi kurashish agentligida “Xalq davlat organlariga emas, balki davlat organlari xalqqa xizmat qilishi kerak” tamoyili asosida xalqimiz murojaatlari bevosita tinglanib, muammolarga oqilona yechim topish choralari koʻrilmoqda.

Bu borada bugun Agentlik direktori A.Burxanovning navbatdagi shaxsiy qabuli boʻlib oʻtdi. Fuqarolar oʻz murojaatlarida asosan sud-huquq masalalari boʻyicha hamda davlat organlari, mahalliy hokimliklarda murojaatlarining toʻliq va xolisona koʻrib chiqilmayotganligidan hamda turli korrupsiyaviy holatlardan noroziliklar bildirishdi.

Qabulda fuqarolarning murojaatlari toʻliq tinglanib, muammolarning yechimi boʻyicha tegishli huquqiy tushuntirish va maslahatlar berildi. Ijrosi oʻrganish va vaqt talab qiladigan murojaatlar boʻyicha fuqarolardan tegishli tartibda ariza va shikoyatlar qabul qilinib, ijrosi qat’iy nazoratga olindi. 

Korrupsiyaga qarshi kurashish agentligi tomonidan amalga oshirilayotgan bu kabi sa’y-harakatlar aholi muammolarining yechim topishiga xizmat qiladi hamda murojaatlarda koʻrsatib oʻtilayotgan korrupsiyaviy holatlarni keltirib chiqarayotgan omillarni tahlil qilgan holda ularni bartaraf etish uchun tegishli chora-tadbirlar ishlab chiqilishiga zamin yaratadi.

Korrupsiyaga qarshi kurashish agentligi

Axborot xizmati