Korrupsiyaga qarshi kurashish agentligi tomonidan 2022-yil avgust oyida davlat buyurtmachilarining davlat xaridlari maxsus axborot portali orqali amalga oshirgan xaridlari tahlil qilindi.

Aniqlanishicha, joriy yilning avgust oyi davomida qiymati 6 380,9 mlrd. soʻmlik 97 332 ta davlat xaridlari amalga oshirilgan boʻlib, ushbu davlat xaridlaridan 381,6 mlrd. soʻmlik 57 221 ta xaridlar elektron doʻkon, 56,4 mlrd. soʻmlik 4 054 ta xaridlar elektron auksion, 629,6 mlrd. soʻmlik 4 070 ta xaridlar eng yaxshi taklifni tanlash, 1 702,2 mlrd. soʻmlik 475 ta xaridlar tender va 3 611,1 mlrd. soʻmlik 31 512 ta xaridlar toʻgʻridan-toʻgʻri shaklida oʻtkazilgan.

Agentlik tomonidan oʻtkazilgan masofaviy monitoring davomida davlat xaridlari toʻgʻrisidagi qonunchilik talablari buzilishi bilan bogʻlik bir qator holatlar aniqlandi.

Masalan, Yuqorichirchiq tumani Yoʻllardan foydalanish unitar korxonasi buyurtmachiligida 2.875,0 mlrd. soʻmlik asfalt beton qorishmalari bilan taʼminlash uchun oʻtkazilgan tanlovda “Davlat xaridlari toʻgʻrisida”gi qonunning 10, 14, 19 va 42-moddalari  hamda “Raqobat toʻgʻrisida”gi qonunning talablari buzilgan holda xarid komissiyasining raisi oʻziga tegishli firma bilan ushbu tanlovda ishtirok etgan holda oʻzini gʻolib deb eʼlon qilganligi va boshqa qonun buzilish holatlari aniqlanib, xarid natijalarini bekor qilish haqida taqdimnoma kiritildi.

Shuningdek, mazkur holat yuzasidan toʻplangan hujjatlar qonuniy qaror qabul qilish uchun Bosh prokuraturaga yuborildi.

Yuqorichirchiq tumani Yoʻllardan foydalanish unitar korxonasi tomonidan Agentlik taqdimnomasi qanoatlantirilib, xarid komissiyasining bayonnomasi 12.08.2022-yilda bekor qilingan.

Shuningdek, “Milliy PR-Markazi” Unitar korxonasi tomonidan 2022-yil 1-avgust kuni “Welcome to Uzbekistan” va “Ziyorat Turizmi” qisqa metrajli videoroliklarni suratga olish yuzasidan 993,0 mln. soʻmlik tanlash oʻtkazilishi haqidagi eʼlon oʻrganilganida Oʻzbekiston Respublikasining “Davlat xaridlari toʻgʻrisida”gi va “Raqobat toʻgʻrisida”gi qonunlarining talablari buzilib, affillanganlik holatlariga baho berilmaganligi, yaʼni tanlovda bir shaxsga tegishli firmalar ishtirok etib gʻoliblikni qoʻlga kiritganligi sababli ushbu xarid natijasini bekor qilish haqida buyurtmachiga taqdimnoma kiritildi.

“Milliy PR-Markazi” Unitar korxonasining 2022-yil 18-avgustdagi xatiga asosan Agentlik taqdimnomasi qanoatlantirilib, xarid komissiyasi bayonnomasi bekor qilinishi taʼminlangan.

Shuningdek, qonunbuzilish holatlariga huquqiy baho berish uchun toʻplangan hujjatlar Bosh prokuraturaga yuborilgan.

Bundan tashqari, Narpay tumani maktabgacha taʼlim boʻlimi tomonidan 182,4 mln. soʻmlik, Konimex tuman yoʻllardan foydalanish Unitar korxonasi tomonidan 100,0 mln soʻmlik, Narpay tumani Tibbiyot birlashmasi tomonidan 100,0 mln. soʻmlik, Fargʻona viloyati hokimligi Yagona buyurtmachi xizmati injiniring kompaniyasi buyurtmachiligida 360,0 mln soʻmlik, Samarqand Davlat chet tillar instituti tomonidan 1,4 mlrd soʻmlik, Taxtakoʻpir tuman obodonlashtirish boshqarmasi tomonidan 107,1 mln soʻmlik, Romitan tuman 26-son imkoniyati cheklangan bolalar uchun ixtisoslashgan maxsus maktab internati tomonidan 146 mln. soʻmlik, Payariq tuman maktabgacha taʼlim boʻlimi buyurtmachiligida 757,5 mln soʻmlik, Paxtachi tuman hokimligi tomonidan 190,2 mln. soʻmlik, Boʻzatov tuman tibbiyot birlashmasi tomonidan 1,0 mlrd. soʻmlik, Tuproqqalʼa tuman hokimligi tomonidan 962,7 mln soʻmlik davlat xaridlarini amalga oshirishda buyurtmachilar tomonidan Oʻzbekiston Respublikasining “Davlat xaridlari toʻgʻrisida”gi va “Raqobat toʻgʻrisida”gi qonunlari talablari buzilishiga yoʻl qoʻyilganligi aniqlanib, buyurtmachilarga xarid natijalarini bekor qilish haqida taqdimnomalar kiritilgan.

Shuningdek, yuqoridagi holatlar boʻyicha qonunbuzilish holatlariga yoʻl qoʻygan mansabdor shaxslarning javobgarligi masalasini hal qilish uchun toʻplangan hujjatlar Bosh prokuraturaga yuborilgan.

2022-yilning avgust oyida davlat buyurtmachilari tomonidan maxsus axborot portallari orqali amalga oshirilayotgan davlat xaridlari masofaviy monitoring tartibida oʻrganilib, aniqlangan qonunbuzilish holatlari yuzasidan jami 19 ta taqdimnoma kiritilib, 21 ta holatlarda jiddiy qonunbuzilish holatlariga yoʻl qoʻygan mansabdorlarning javobgarligini hal qilish uchun toʻplangan hujjatlarga Bosh prokuraturaga yuborilgan.

Bu boradagi ishlar davom ettirilmoqda.

Korrupsiyaga qarshi kurashish agentligi

Axborot xizmati